Qazaqstandyq mýzykant Angliianyń Lids qalasynda ótken bedeldi baiqaýda bas júlde jeńip aldy. 23 jastaǵy pianist Álim Beisembaev úsh jylda bir ret uiymdastyrylatyn jáne talai talanttarǵa qanat bitirgen halyqaralyq óner dodasynda altyn medal qanjyǵalady, dep habarlaidy QazAqparat.
Álim álemniń túkpir-túkpirinen kelgen pianisterdi shań qaptyrdy. Odan keiingi oryndarda japoniialyq ónerpaz ekinshi, izraildik mýzykant úshinshi oryn aldy. Bas júlde Fanni Ýoterman atyndaǵy altyn medal. Ýoterman – 20 jyldyq tarihy bar baiqaýdyń negizin qalaýshy álemge áigili pianist. Ótken jyly 100 jasqa kelip, qaitys bolǵan. Medaldan bólek Álim Beisembaev 25 myń sterling fýnty kólemindegi aqshalai syilyqqa ie boldy jáne eń bastysy Warner Classics mýzykalyq leiblymen kelisim-shartqa otyrdy. Eýropa boiynsha týrǵa shyǵý múmkindigi taǵy bar.
«Bizge shamamen keminde 300-350 minýttai repertýarmen qatysý kerek boldy. Oryndalatyn shyǵarmalardyń kólemi kóp bolǵandyqtan óte qiyn baiqaýlardyń biri sanalady. Jeńisimnen keiin Ýorner Klassiks leibly kúni keshe meniń jeke albomymdy basyp shyǵardy. Ony Eppl Miýzik jáne Spotifai qosymshalary arqyly tyńdaýǵa bolady», deidi Álim Beisembaev.
Álim fortepianoda 5 jasynan oinaidy. Kúlásh Baiseiitova atyndaǵy mýzykalyq mektepte, Jániia Áýbákirova mektebinde jáne Máskeýdegi Chaikovskii atyndaǵy konservatoriia janyndaǵy mektepte oqyǵan. 12 jasynan bastap, Angliiadaǵy jas mýzykanttarǵa arnalǵan Persella mektebinde, 18 jasynan bastap, Mýzykanyń Koroldik akademiiasynda ataqty pedagog Tessa Nikolsonnyń qolynda tegin bilim alǵan.
«Ata-anamnyń eshqaisysynyń ónerge qatysy joq. Men úidegi jalǵyz mýzykantpyn. Ol kisilerdiń aitýynsha, kishkentai kezimde dúkenge barǵanymda shaǵyn oiynshyq pianino tańdap alyppyn. Sodan beri fortepiano meniń ómirlik serigime ainaldy», deidi jeńimpaz.
Álim qazir Londondaǵy Koroldik mýzykalyq kolledjde magistratýrada oqidy. Qazaqstandyq ónerpazǵa degen suranys óte joǵary. Iri kontsertter berip, eýropalyq kórermenniń ystyq yqylasyna bólenip júr. Ol týraly sheteldik basylymdar da jarysyp jazyp jatyr. Álim álemdik týrǵa shyqqan ýaqytynda týǵan jerinde de óner kórsetýdi armandaidy.
