Álem boiynsha koronavirýs juqtyrý jaǵdailarynyń jalpy sany dúisenbi kúni 13 millionǵa jetti. Bes kún ishinde bul kórsetkish bir millionǵa artqan, dep habarlaidy Reuters.
Koronavirýs pandemiiasy saldarynan alty jarym ai ishinde jarty millionnan astam adam qaitys bolǵan. Dúniejúzilik densaýlyq saqtaý uiymynyń (DSU) basshysy Tedros Adhanom Gebreiesýs eger aldyn alý sharalary elenbese, jaqyn arada qalypty jaǵdaiǵa oralmaimyz dep málimdedi.
Reuters esepteýine sáikes, indet Latyn Amerikasynda tez taralýda. Álemde anyqtalǵan aýrý juqtyrý jáne ólim jaǵdailarynyń jartysynan astamy AQSh-tyń úlesine tiesili. Qurama Shtattarynda koronavirýsty juqtyrýdyń 3,3 millionnan astam rastalǵan jaǵdaiy tirkelgen.
Aýstraliiadaǵy Melbýrn men Angliiadaǵy Lester ekinshi ret qatań oqshaýlaý rejimin engizdi. Gonkong aýrýdyń tómen kórsetkishine (1522 jaǵdai) qaramastan, úshinshi tolqynǵa qatysty artyp kele jatqan qaýip aiasynda áleýmettik qashyqtyq sharalaryn kúsheitýdi kózdep otyr. 10 shilde kúni Qurama Shtattar álemde kún saiyn aýrý juqtyrýdyń 69 070 jańa jaǵdaiy tirkelip jatqanyn habarlady.
Jeksenbi kúni amerikalyq Florida shtaty indet juqtyrýdyń rekordtyq ósimi týraly habarlady. Munda bir táýlikte 15 000 jańa jaǵdai tirkelgen. Dúisenbi kúni bilik aýrý juqtyrýdyń 12 624 jańa jaǵdaiy týraly málim etti. AQSh-tyń shamamen 40 shtatynda indet juqtyrý ósimi rastaldy.
Eýropada koronavirýstan kóp zardap shekken memleketterdiń biri Ispaniia ótken aida el boiynsha karantin rejimin toqtatqan bolatyn. Úndistan infektsiia juqtyrý sany jóninen álemde úshinshi orynda. Elde shilde aiy bastalǵaly ortasha eseppen kúnine 23 000 jańa jaǵdai tirkelýde.
