QR Densaýlyq saqtaý ministri Aleksei Tsoi qoǵamdaǵy qaýipsizdik pen gigiena sharalaryn ári qarai saqtaýdy usyndy, dep habarlaidy QazAqparat.
«Búginde búkil qazaqstandyq qoǵam koronavirýstyń emes, qaýipsizdik pen salaýatty ádetterdiń «juqpaly» bolýy úshin barlyq sharalardy qabyldaýy qajet. Ol úshin eń aldymen maskalyq rejim men gigienany ári qarai saqtaýdy qamtamasyz etý qajet. Úiden tys jerde maskany mindetti túrde taǵý – infektsiianyń taralýyn 30%-ǵa qysqartady. Sonymen birge, infektsiianyń taralýynda qol gigienasy erekshe ról atqarady», - dep atap ótti ministr búgingi Úkimet otyrysynda.
Osyǵan bailanysty, eń aldymen múddeli memlekettik organdar men jergilikti atqarý organdaryn tartyp, qaýipsizdik beldikterin mindetti qoldaný mysalynda maska rejimin saqtaý úshin de biznesti baqylaý men jaýapkershilikti kúsheitý qajet.
Ekinshiden, barlyq qoǵamdyq oryndarda qoldy óńdeý úshin saniterlerdi ornatýdy qamtamasyz etý kerek.
Úshinshiden, barlyq aqparattyq arnalar boiynsha halyqpen aqparattyq-túsindirý jumystaryn júrgizý kerek.
«Sondai-aq, áleýmettik qashyqtyq qaǵidaty saqtalýy tiis: keńselerdiń qashyqtan jumys isteýi (20/80 qatynasynda) jáne oqýshylar men stýdentterdi qashyqtyqtan oqytý; Maskalyq rejimdi men áleýmettik qashyqtyqty saqtaý múmkin bolmaǵandyqtan, buqaralyq is-sharalardyń barlyq túrine tyiym salý; Biznestiń jaýapkershiligin arttyrý – baqylaýdy kúsheitip, nysandardy bólikterge bólý jáne adamdardyń tolyp ketpeýin qadaǵalaý kerek. Bul sharalar barlyq aqparattyq arnalar boiynsha nasihattalýy qajet», - dedi Aleksei Tsoi.
