Halyqaralyq Olimpiada kúnin Qazaqstanda atap ótý estafetasyn Soltústik Qazaqstan óz moinyna aldy. Petropavlda jappai velosherý ótti. Velosherýdi Olimpiada chempiony Aleksandr Vinokýrov bastady, dep habarlaidy "Ult aqparat".
Bul mereke jyl saiyn 23 maýsymda atap ótiledi. Atalǵan mereke Qazaqstanda 28-shi ret toilanbaq. Osyǵan orai, Ulttyq Olimpiadalyq komitet búkil maýsymdy olimpiadalyq qundylyqtarǵa arnaidy. Barlyq is-sharalar halyqaralyq olimpiadalyq qozǵalystyń «Bárimiz birge: jyldam, biikke, myqty» jańa uranymen ótedi.
Vinokýrov atyndaǵy sport saraiynan júzden astam veloshabandoz velosherýge qatysty. Eresekter men balalar qala kóshelerimen 10 shaqyrymdai júrip ótti.
Qatysýshylarǵa Olimpiada kúnine qatysqany úshin Halyqaralyq Olimpiada komitetiniń basshysy Tomas Bah pen elimizdiń Ulttyq Olimpiadalyq komitetiniń prezidenti Timýr Qulybaevtyń qoly qoiylǵan sertifikattar tabystaldy.
«Men osynda kelgenime jáne sportty súietin jerlesterimmen kezdeskenime qýanyshtymyn. Bul kúnderi velosporttan Qazaqstan chempionaty ótip jatyr, sondyqtan Petropavldy dál qazirgi tańda velosipedshiler mekeni dep ataýǵa bolady. Búgingi sharaǵa qatysqandar qatarynda bolashaq olimpiadashylardyń bar ekenine senimdimin», - deidi Olimpiada chempiony Aleksandr Vinokýrov.
«Osyndai uzaq qashyqtyqty baǵyndyrǵanym úshin keýdemdi maqtanysh kerneidi. Ata-anam da jankúierlik tanytyp, qoldaý bildirdi. Búgingi mereke – tamasha mereke bolyp sanalady. Endi jyl saiyn atap ótemin dep oilaimyn», - deidi velosherýge qatysýshy Aniia Baigýjinova.
Olimpiada kúni aiasynda merekeni atap ótý 20 maýsymda Almatyda sporttyq quzǵa órmeleý boiynsha saiyspen jalǵasady. 21 maýsymda Aqtaýda boks jáne dziýdodan sheberlik synyptary ótkizilse, 23 maýsymda elordada basketbol oiyndary, strit vorkaýt, kanoede esýden jáne tekboldan saiystar uiymdastyrylatyn sporttyq shara ótedi.
