Alakólge joldamalardy brondaý men satý bastaldy. Týragenttikter men Almaty oblystyq týrizm basqarmasynyń boljaýynsha, biyl kólge keletinderdiń sany artpaq. Tipti rekordtyq kórsetkishke jetýi múmkin. Qazirgi tańda Almaty jáne Shyǵys Qazaqstan oblysy Alakól jaǵalaýynyń infraqurylymyn jetildirýde, dep habarlaidy "Ult aqparat".
Almaty oblystyq týrizm basqarmasynyń málimetine sáikes, Alakól kóliniń jaǵalaýynda qazirgi kezde 250 ornalastyrý obektileri bar. 2020 jyly 14 jańa nysan salý jasparda.
«Qazirgi tańda Aqshi aýylynda demalys saiabaǵynyń qurylysy júrgizilýde. Aǵymdaǵy jyldyń 6 shildesine deiin qurylysty aiaqtaý josparlanýda. Park aýmaǵynda avtokólik turaǵy, arkasy bar eki kirý toby, kúrkeler, oiyn alańdary, ortalyq qalqa, jazǵy kafe, 336 adamǵa arnalǵan amfiteatr, jazǵy sahna, fýtbol alańy, voleibol alańy, velosiped alańy, roliktermen syrǵanaýǵa arnalǵan alań, eki dárethana jáne trenajerlerge arnalǵan alań ornalasady»,– deidi Almaty oblystyq týrizm basqarmasynyń týristik jobalardy josparlaý jáne júzege asyrý bóliminiń basshysy Baqytjan Orazbaev.
Sonymen qatar, ol 2020 jyldyń 1 maýsymynan bastap kún saiyn «Nur-Sultan-Úsharal-Nur-Sultan» jáne «Almaty-Úsharal-Almaty» baǵyttary boiynsha reister ashylǵanyn aitty. 8 maýsymnan 24 qazanǵa deiin «Almaty-Úsharal-Almaty» baǵyty boiynsha qosymsha reis bolady (dúisenbi, sársenbi, beisenbi, juma, jeksenbi).
Aǵymdaǵy jyldyń 3 aqpanynan bastap «Jetisý» aviakompaniiasy AQ «Taldyqorǵan-Úsharal-Taldyqorǵan» baǵyty boiynsha reisti aptasyna 7 ret júzege asyrady. Sondai–aq, «Jetigen-Dostyq-Jetigen» baǵyty boiynsha áleýmettik mańyzy bar aýdanaralyq temir jol baǵyty sýbsidiialanady, osy maqsatqa oblys biýdjetinen 2017 –2021 jyldarǵa 85 mln teńge qarastyrylǵan.
«Poiyz 2020 jyldyń maýsym aiynan tamyz aiyna deiin aptasyna 3 ret júredi. 7 vagon iske qosylǵan. Bir bilet baǵasy platskart 2686 tg, kýpelik 4500 tg. jalpy oryn sany - 324. Tasymaldaýshy kompaniia qosymsha 10 kommertsiialyq vagon usynýǵa daiyn»,– deidi ol.
Al, Shyǵys Qazaqstan aýmaǵyndaǵy jaǵalaýda 11 552 jatyn orny bar demalýshylarǵa arnalǵan 176 oryn iske qosylǵan. Olardyń barlyǵy onlain brondaýǵa daiyn. Bir adamǵa turý baǵasy shamamen 2600 - 10 500 tg.
ShQO týrizm jáne ishki bailanys basqarmasynyń basshysy Marat Qabaqovtyń aitýynsha, Alakólde jaǵalaýdy damytý boiynsha úlken jumystar atqaryldy.
«Biz alǵash ret Respýblika, sonymen qatar oblys kóleminde sanitar dárigerdiń qaýlysymen týristerdi ornalastyrý nysandarynyń jumystary rettelgen pandemiia jaǵdaiynda jumys isteimiz. Týristik biznestiń barlyq sýbektileri bul jaǵdaidyń tek Qazaqstanda ǵana emes, búkil álemde oryn alǵanyn túsinedi, sondyqtan karantindik sharalardan sharshaǵan qazaqstandyqtardyń demalysy joǵary deńgeide bolýy úshin bar múmkindikti jasaidy»,– dedi Marat Qabaqov.
Alakóldiń shyǵys jaǵalaýyndaǵy barlyq demalys bazasynda jeke qorǵanys zattary bar (meditsinalyq maskalar, qolǵaptar), zararsyzdandyrý zattary, onyń ishinde qoldy jýýǵa arnalǵan antiseptikter, sondai-aq temperatýrany ólsheýge arnalǵan bailanyssyz termometrler.
Týrizm salasyndaǵy kásipkerlik sýbektileriniń jumysy Shyǵys Qazaqstan oblysy memlekettik Bas sanitar dárigeriniń 21 mamyr 2020 jylǵy №10 qaýlysymen rettelgen.
«Semei men Óskemen qalalarynyń áýejaiyna kelgen barlyq jolaýshylar COVID-19 ekspress-synaqtamasyn tapsyratyn bolady. Áýejailarda, temirjol men avtovokzaldarda mindetti túrde meditsinalyq betperdeni kiip, araqashyqtyqty saqtap, sanitaizerlerdi qoldaný kerek. Budan basqa, keletin jáne ketetin jolaýshylar úshin jeke dálizder jumys isteidi, áýejai men vokzal ǵimarattarynda jolaýshylardy shyǵaryp salýǵa tyiym salynady»,– deidi ol.
«Injý» demalys kesheniniń iesi Elena Asylbekovanyń aitýynsha, Alakóldiń Shyǵys jaǵalaýyndaǵy týristik nysandardyń basym bóligi sanitar dárigerlerdiń jańa talaptaryna beiimdelgen jáne aldaǵy týristik maýsymnyń sátti ótetinine senimdi.
Aita keterligi, qazir, otandyq týragenttikter jappai ishki týrizmen analysa bastady. Oǵan sebep, álemdik pandemiia.
«Biz eshqashan ishki týrizmen ainalysyp kórgen emespiz, biyl alǵash ret qolǵa aldyq. Onyń sebebi, aitpasa da túsinikti. Bul karantindik rejimge bailanysty. Biylǵy jyldyń týristik trendi – Alakól. Qazaqstandyq týragenttikterdiń barlyǵy ishki týrizmge kóshti. Olar tek Alakólge ǵana emes, sonymen qatar Qapshaǵai, Balqash, Býrabai siiaqty jerlerge de arnaiy baǵdarlama ázirlep jatyr. Ótken jyldary Alakólge suranystyń qandai bolǵanyn bilmeimin, biyl aitarlyqtai ósetin siiaqty. Qazirdiń ózinde tapsyrys berýshilerdiń qatary kóbeidi. Rekordttyq kórsetkishke jetýi de ábden múmkin»,– deidi Maksim Banin NT.kz týragenttiginiń direktory.
Alakólde demalýdy dástúrge ainaldyrǵan almatylyq Janysbekovtar otbasy biylǵy demalystaryna erterek qamdana bastady.
«Biz Alakólge jylda shilde aiynda baramyz. Aqshide demalǵandy jaqsy kóremiz. Jyldan-jylǵa qyzmet kórsetý salasy damyp keledi. Árine, sáikesinshe baǵasy da artyp otyrady. Mysalǵa, osydan úsh jyl buryn tórt adam (eki eresek, eki bala) bir aptaǵa 100 myń teńge jumsasaq, ótken jyly 140 myń teńgeshe kóbeidi. Biyl Alakólde demalýshylardyń sany artady. Sondyqtan erterek qamdanýǵa kiristik. Keshe ǵana baryp oryn brondap keldik»,– deidi almatylyq Erlat Janysbekov.
