Almaty oblysynyń ákimi Amandyq Batalov Alakól mańyndaǵy jańa áýejaiǵa nelikten jóndeý jumysy júrgiziletinin túsindirdi, dep habarlaidy QazAqparat.
«Kóptegen adamdar áýejaidy qaita jóndeýdiń ne qajeti bar dep oilaidy. 2015 jyly Elbasy Qorǵanys ministrliginiń balansynda turǵan áýejaidy bizge berýdi tapsyrdy. Bul oryndaldy. Birinshi kezekte jergilikti biýdjet esebinen ádemi terminal – aerovokzal ǵimaraty salyndy. Qazir ol tabysty jumys istep tur, Nur-Sultan, Taldyqorǵannan ushaqtar qabyldaidy. Osynyń arqasynda demalýshylar sany artyp keledi. Biraq ushý-qoný jolaǵynyń jai-kúii kóńil kónshitpeidi. Sol úshin jaqyn kórshilerimizden ótinishter túsip jatyr. Olar Alakólge ózderiniń charterlik ushaqtarymen ushqysy keledi. Biraq ushý-qoný jolaǵy oǵan múmkindik bermeidi», - dedi Batalov QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Ol úshin eki bólikten turatyn jobalyq-smetalyq qujattama ázirlendi: ushý-qoný jolaǵyna 4,7 mlrd teńge jáne aeronavigatsiiaǵa, aýmaqty qorshaýǵa, kúzet dabyl júiesin ornatýǵa, jaryqtandyrýǵa 2,5 mlrd teńgege jýyq qarajat bólingen.
«Bizdi Úkimet qoldady jáne bizge 4,7 mlrd teńge bólindi. Tender rásimin ótkizip, jaqsy merdigerlerdi aldyq. Muny jyl sońyna deiin igerýimiz kerek. Jóndeý jumystaryn júrgizsek, bizge Boeing 737 ushaǵy qona alady, sonda týrister aǵyny da artady. Qalǵan 2,5 mlrd teńge jergilikti biýdjetten bólindi», - dep túsindirdi Amandyq Batalov.
