Aqtóbelik ustazdar №20 mektep direktory Baǵdat Ýrýmbaeva jáne №33 mektep direktory Almira Oraqovany eske aldy, dep habarlaidy "Ult aqparat".
Búgin №20 mektep direktory Baǵdat Ýrýmbaeva jáne №33 mektep direktory Almira Oraqovany áriptesteri eske aldy. Olardyń fotosyn mektep dálizine qoiyp, estelikterin bólisti.
«Men 2016 jyly mektep direktorlarynyń respýblikalyq biliktiligin arttyrý kýrsynda kezdestim. Ol bilikti basshy, talapshyl, ádil boldy. Ujymdaǵy ár adamǵa teń qarady. Qimaimyz. Almira Oraqova buǵan deiin birneshe kolledjde direktor, birneshe mektepte direktordyń orynbasary qyzmetterin atqardy, - dedi №33 mekteptiń muǵalimi Orazbai Ulqabai.
Qalalyq bilim bóliminiń basshysy da bilim berý salasynyń damýyna úles qosqan qos direktordyń eńbegin atap ótti.
«Bolashaq urpaqtyń bilim berý isinde eren eńbek etip,mektep jumysyn sheber úilestirip, ustaz únine, ata-ana usynysyna úlken jaýapkershilikpen qaraǵan, shyǵarmashyl, izdenimpaz, jeńimpaz shákirt tárbieleýde eren eńbek etken áriptesterimiz № 20 orta mektep-litseiiniń direktory Ýrýmbaeva Baǵdad Aisultanqyzy men № 33 orta mektebiniń direktory Orakova Almira Shaharbekqyzy kenetten ómirden ótti. Olar biz úshin tek áriptes qana emes, úlgili ana, meiirimdi jan, aqylshy dos, úlken júrekti jany jaisań azamatshalar boldy. Alla olardyń janyna tynyshtyq berip, jánnattyq etsin. Bul orny tolmas qazada áriptesterimizdiń otbasyna qaiǵylaryńyzǵa shyn júrekten ortaqtastyǵymdy bildirgim keledi. Bilim salasyna, onyń ishinde Aqtóbe qalasynyń bilim deńgeiin kóterýde sińirgen zor eńbekteri jadymyzda máńgi saqtalady»,-dedi Aqtóbe qalalyq bilim bóliminiń basshysy Metkúl Qosymbaeva.
Eske salsaq, Oiyl-Qobda tasjolynda kólik aýdarylyp, eki mektep direktory oqiǵa ornynda kóz jumdy.
Taǵy ekeýi aýrýhanada jatyr.
