Aqtóbe oblysy boiynsha 113 myńnan astam adam vaktsinanyń birinshi komponentin qabyldady. Al 70 myńǵa jýyq adam eki komponentin de saldyrdy. Búginde óńirdegi keibir óndiris ornynyń jumysshylary túgel immýndaldy, dep habarlady QazAqparat.
Aqtóbedegi «Dinar-Elektromash» óndiris orny men «Energiia» saýda úiiniń qyzmetkerleri túgel vaktsinatsiialandy. Bul óńirdegi iri seriktestikter. Onda 170-ten astam adam eńbek etedi. Kompaniia quryltaishysy Sergei Vishniak vaktsinatsiialaý jumysynyń tiimdiligi men ujymdaǵy aýyzbirshilik týraly aityp berdi.
«Adamnyń qandai da bir qadam jasaýyna kóndirmes buryn óziń mán-maǵynasyn, salmaǵyn uǵynýyń kerek. Tarihqa súiensek, adamzat tarihynda birneshe indet bolǵan. Tyrysqaq, sheshek siiaqty aýrýlardy jeńý úshin vaktsinaǵa júgingenimiz bárimizge málim. Qazir de dál sol jaǵdai. Vaktsina – ómirimizdi qutqarady. Meniń oiymsha, áleýmettik jelidegi daqpyrtqa senetin, bilimi taiaz adamdar ǵana ózin, ózgeni joldan taidyrady. Al mamannan keńes alǵan, jan-jaqty, kózi ashyq adamnyń muny ult saýlyǵyn saqtaýǵa jasalǵan qadam ekenin anyq uǵynady. Pandemiia bizdi de ainalyp ótpedi. Ólimdi kórdim, ózim de aýyrdym. Al ózgeni sendirýge, kóndirýge keler bolsaq, joly qarapaiym. Adamdardy jaqsy kórý kerek», - dedi Sergei Vishniak. Onyń aitýynsha, jan-jaǵyńdaǵy adamdar aman júrsin, uzaq ómir súrsin deseń, vaktsina saldyrǵany jón.
«Jappai vaktsina alyp, qarań karantin shekteýin jeńildetkender bar. Sony úlgi tutýymyz kerek. Bizdiń mekemege shirkeý, meshit qyzmetkeri, meditsina mamandary men epidemiologtar jii keledi. Olar túsindirý jumysyn júrgizedi. Al qarsy, kózqarasy ózge adamdarmen jeke sóilesip, áńgime-dúken qurady. Raiynan qaitara almasań da oi salasyń. Sol oi kúsheise, ol da áriptesterin qoldaidy. Sonymen birge, elimizde «Tutynýshylardyń quqyǵyn qorǵaý týraly» Zań bar. Iia, biz kelýshilerge qaýipsizdikti qamtamasyz etýimiz kerek. Eger osy joldy tańdasaq, vaktsina saldyrsaq, úzdiksiz jumys isteýge, tabys turaqtylyǵyna qol jetkizemiz. Muny bári uǵyndy. Tipti olar óz otbasynyń múshelerin ertip kelip, ekpe qabyldady»,- dedi Sergei Vishniak.
Aita keteiik, qazir saýda úiinde sanitariialyq jaǵdai saqtalǵan. Munda klienttiń dene qyzýyn ólshep, qajet kezde maskany tegin taratady.
«Biz ár jumysshyny qurmetteimiz, baǵalaimyz. Olar muny anyq sezedi. Jumysshylar da syilastyqqa syilastyqpen jaýap berip, bizdi qoldady», - dedi quryltaishy.
