«Miraj-Ýragan» modernizatsiialanǵan júiesi arqyly Ózbekstan azamatynyń 146 ret jyldamdyqty asyryp, bir ret baǵdarshamǵa baǵynbaǵany anyqtaldy, dep habarlaidy "Ult aqparat".
Aqtóbe oblystyq politsiia departamenti Ákimshilik politsiia basqarmasynyń qyzmetkerleri QR jol qozǵalysy erejesin qasaqana buzǵan adamdy anyqtady.
«Miraj-Ýragan» modernizatsiialanǵan júiesiniń kómegimen Ózbekstan Respýblikasynyń azamaty ustalǵan. Ol jyl basynan beri 147 ret ereje buzdy.
«VAZ-21099 avtokóliginiń júrgizýshisi 146 ret jyldamdyqty asyryp, bir ret baǵdarshamnyń tyiym salatyn signalynan ótip ketken. Aiyppuldyń jalpy somasy 3 mln 390 myń teńgeni qurady. Politsiia material jinap, sheshim qabyldaý úshin isti ákimshilik sotqa jiberdi», - dedi oblystyq PD baspasóz qyzmetiniń jetekshisi Erbolat Sarqulov.
Jyl basynan beri «Miraj-Ýragan» modernizatsiialanǵan júiesiniń kómegimen buryn kólik quralyn basqarý quqyǵynan aiyrylǵan 46 júrgizýshi men 113 memlekettik boryshker anyqtalyp, 21 mln teńgeden astam qarajat óndirildi.
