Aqtóbe oblystyq qylmystyq ister jónindegi mamandandyrylǵan aýdanaralyq sotynda Qazaqstannyń 3 dúrkin chempiony Dáýlet Hairollanyń ólimine qatysty sot otyrysy bastaldy, dep habarlaidy "Ult aqparat".
Aqtóbe oblysynyń qylmystyq ister jónindegi mamandandyrylǵan aýdanaralyq sotyna S.J.Sadýovqa qatysty Qylmystyq kodekstiń «Qarýdy zańsyz satyp alý, saqtaý, tasymaldaý nemese alyp júrý», «Qylmysqa daiyndalý jáne qylmys jasaýǵa oqtalý», «Adam óltirý», «Buzaqylyq nietpen eki nemese odan da kóp adamdy óltirý» baptary boiynsha qylmystyq is tústi.
«Aiyptaý aktisine sáikes, Sadýov atys qarýyn zańsyz alyp júrgen, tasymaldaǵan jáne saqtaǵan. Sonymen qatar, biylǵy 4 aqpan kúni túsinispeýshilik saldarynan Sadýov alkogoldik mas kúide atys qarýynan J.-ǵa oq atqan, J. atylǵan oqtan qutyla alǵan. Artynsha, Sadýov jábirlenýshi H.-ǵa qarýdy baǵyttap, ekinshi ret oq atqan. Keltirilgen dene jaraqatynan sońǵysy qaza boldy. Qylmystyq is aldyn ala tyńdaý satysynda», - dep habarlady Aqtóbe oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmetinen.
Búgin karateden Qazaqstan kýbogynyń úsh dúrkin chempiony, marqum Dáýlet Hairollanyń týǵan-týystary sot aldyna jinalyp, bir emes, birneshe kúdiktiniń iske jaýapty ekenin aitty.
«Ol jerde bir emes, birneshe kúdikti bar. Sondyqtan biz isti qaita tergeýge jiberip, qylmys jan-jaqty qaita qaralsa deimiz. Bárin jaýapqa tartýdy suraimyz. Kýágerlerdiń aitýynsha, kúdiktini qairamaǵanda ol oq atpas edi. Jan-jaǵyndaǵylar «at, at!» dep aitqan eken», - dedi Dáýlet Hairollanyń apasy Jadyra Aijanova.
