Foto: ashyq derekkóz
Aqtóbe qalasynda «Harmony Rider Technology» (HRT) qarjy piramidasyn qurý jáne oǵan basshylyq etý, sondai-aq qylmystyq jolmen alynǵan qarajatty zańdastyrý faktileri boiynsha sot úkimi shyqty, dep habarlaidy Ult.kz.
Isti Qarjylyq monitoring agenttiginiń Aqtóbe oblysy boiynsha departamenti tergegen. Tergeý málimetinshe, 2024 jyly bir top tulǵa ózin shetelde elektrosamokattardy satyp alyp, jalǵa berýmen ainalysatyn halyqaralyq kompaniia retinde tanystyryp, qarjy piramidasyn uiymdastyrǵan.
Alaida shyn máninde salymshylarǵa tólenetin tabys jańa qatysýshylardan tartylǵan qarajat esebinen qalyptasqan. Azamattardy tartý úshin áleýmettik jeliler men messendjerlerde jarnama júrgizilip, oflain kezdesýler men tanystyrylymdar uiymdastyrylǵan. Sonymen qatar, zańdy qyzmet áserin qalyptastyrý maqsatynda Aqtóbe qalasynda keńse jalǵa alynǵan.
Salym kólemi 350-den 20 myń AQSh dollaryna deiin bolǵan. Al ýáde etilgen tabys táýligine 12-den 690 dollarǵa deiin jetken.
Qarajatty zańdastyrý úshin uiymdastyrýshylar kriptoámiiandardy paidalanyp, qarajatty ainalymǵa shyǵaryp, keiin aiyrbastap, bank shottaryna aýdaryp otyrǵan.
Nátijesinde 115 salymshydan jalpy somasy 197 mln teńgeden astam qarajat tartylǵan. Zańsyz tabysqa úsh avtokólik satyp alynyp, onyń biri týysynyń atyna rásimdelgen.
Sot úkimimen uiymdastyrýshylar 6 jylǵa deiin bas bostandyǵynan aiyryldy. Sonymen qatar, úsh avtokólik memleket kirisine tárkilendi. Úkim zańdy kúshine endi.
