Aqtóbede koronavirýs infektsiiasyn juqtyrý deregi azaidy. Qazir infektsiialyq aýrýhananyń ózi rezervke qoiylyp, naýqastar ftiziopýlmonologiialyq ortalyqta em alyp jatyr, dep habarlaidy "Ult aqparat".
Bir táýlikte taǵy 12 adamnan koronavirýs infektsiiasy anyqtaldy. Onyń teń jartysy derttiń simptomdy túrine shaldyqqan.
Aqtóbe qalasynda bes, Mártók aýdanynda bir adam aýrý belgilerimen dáriger kómegine júgingen.
Oblystyq sanitariialyq-epidemiologiialyq baqylaý departamenti baspasóz qyzmetiniń habarlaýynsha, óńirde barlyǵy 11 522 jaǵdai tirkelip, onyń 96 paiyzǵa jýyǵy jazyldy.
Áli de 2 myńnan astam adam úi karantininde. Al infektsiialyq statsionarlarda 188 adam em alyp jatyr.
«Aýrýshańdyqtyń tómendeýine bailanysty infektsiialyq statsionar sany azaidy. Sonyń ishinde aýdandarda kereýet sany qysqardy. Al Aqtóbe qalasy boiynsha oblystyq ftiziopýlmonologiialyq ortalyǵy ǵana koronavirýs infektsiiasyn juqtyrǵandardy qabyldaidy. Al infektsiialyq aýrýhananyń ózi rezervte bolady»,-dedi oblystyq densaýlyq saqtaý basqarmasy basshysynyń orynbasary Bekbolat Izbasarov.
Sonymen birge COVID-19-den aiyqqan naýqastar ambýlatorlyq jáne statsionarlyq túrde saýyqtyrýdan ótti. Búginge deiin 1500 adam densaýlyǵyn nyǵaitty.
«Eger naýqas dertti aýyr jáne ortasha aýyrlyqta ótkerse, shaǵymy bolsa, ýchaskelik dárigerge barýy tiis. Sodan keiin saýyqtyrý kýrsynan ótýge bolady», - dedi Bekbolat Izbasarov.
Aqtóbe oblysy boiynsha qazir 17 bala baqylaýda. Olardyń bári ambýlatorlyq em alyp jatyr.
«Aqtóbe oblysy boiynsha 202 450 doza jetkizildi. 97 284 adam birinshisin, 49738 adam eki komponentin de qabyldady. Qazirgi kezde vaktsina bar. Turǵyndar dáriger tekserýinen ótip, qabyldaýyna bolady», - dedi oblystyq densaýlyq saqtaý basqarmasy basshysynyń orynbasary Bekbolat Izbasarov.
