Aqtóbe oblysynyń ákimi Ońdasyn Orazalin óńirdegi 8 ózenniń arnasyn tereńdetý jobasy nege toqtaǵanyn túsindirdi, dep habarlaidy QazAqparat.
«Úsh jyl buryn óńirdegi 8 ózenniń jaǵasyn bekemdep, arnasyn tereńdetý úshin biýdjetten 6 mlrd teńgeden astam qarajat bólingen bolatyn. Sol jumystardyń kesirinen jergilikti ózender men sý qoimalary ylǵal kózinen airyldy. Ekologtar sonyń saldarynan Aqtóbe oblysynda aýyzsý tapshylyǵy týyndaýy múmkin degen qaýip aityp júr. Biyl Shalqar kóliniń tabanyn tazartýǵa taǵy 3 mlrd teńge bólindi. Osynsha shyǵynmen istelgen jumystyń halyqqa qandai paidasy bar? Nátijesinde ózenderdiń sýy kóbeigen joq qoi», - dep surady BAQ ókili Ońdasyn Orazalinnen.
«6 mlrd teńge týraly aqparatyńyzda qatelik bar. Jobanyń tolyq quny sonsha bolatyn. Joba qazir toqtatylǵan. Qasym-Jomart Kemelulynyń tapsyrmasy boiynsha óńirge Ekologiia, geologiia jáne tabiǵi resýrstar ministri Maǵzum Myrzaǵaliev kelgenin bilesiz. Sol kezde qoǵamdyq qaýymdastyq ókilderimen birge jobany toqtata turý týraly sheshim qabyldanǵan. Joba túzetýge jiberildi. Túzetý ekologiia qaýymdastyq talap-tilekterin eskere otyryp, jalǵasyp jatyr. Siz ataǵan kólemdegi aqsha shyǵyndalǵan joq», - dedi Ońdasyn Orazalin ortalyq kommýnikatsiialar qyzmetinde ótken baspasóz konferentsiiasynda.
Sondai-aq, ol atalǵan ózenderdiń sýy azaiyp ketkeni klimattyq ózgeristerge bailanysty degen paiym aitty.
«Ózen arnasyn tereńdetý jumysy týraly aitsaq, qanshalyqty qajet ekenin saraptama bitkennen keiin habarlaimyz. Jobany respýblika tarapynan qarjylandyrý máselesiniń de basy ashyq tur. Shalqar kóliniń tabanyn tazartý jumysy qajet pe, joq pa degendi aýdannyń turǵyndarynan suraǵan jón dep oilaimyn. Meniń oiymsha, bul jumys qajet. Turǵyndardyń ótinishin Memleket basshysy da qoldaǵan bolatyn. Aspannan jaýatyn jańbyrdyń kólemi bizge bailanysty emes qoi. Bir jyl bir jylǵa uqsamai tur. Aldaǵy jyldarda óńirdegi ózen arnalary qalpyna keledi dep úmittenemin», - dedi Ońdasyn Orazalin.
