Aqtóbe oblysynyń ákimi Ońdasyn Orazalin ortalyq kommýnikatsiialar qyzmetinde ótken baspasóz konferentsiiasynda óńirdegi qýańshylyq qaýpi bar aýdandardyń qysqa daiyndyǵy týraly aqparat berdi, dep habarlaidy QazAqparat.
Baspasóz konferentsiiasynda Ońdasyn Orazalinge Hromtaý, Áiteke bi aýdandarynda bolýy yqtimal qýańshylyqqa daiyndyq qalai júrip jatqany týraly saýal qoiyldy.
«Birinshiden, bári de adam balasynyń ózine bailanysty bolady. Eger aldyn ala qamdansa, Aqtóbe óńirinde tolyq múmkindik bar. Biz jergilikti ákimdikterge, aýyl sharýashylyǵy basqarmasyna, aýdan ákimderine ár sharýa qojalyqpen tikelei jumys isteý týraly tapsyrma berdik. Qazirgi tańda shabyndyq ta, jiylym da jetkilikti. Biraq keibir jerlerde aýa raynyń qolaisyzdyǵy saldarynan qaýip bar ekenin baiqap otyrmyz», - dedi aimaq basshysy.
Onyń aitýynsha, qazir aqtóbelik sharýalar qysqa daiyndalýmen qatar kórshi óńirlerdegi jutqa ushyraǵan eldi mekenderge kómek qolyn sozyp jatyr.
«Sonymen qatar, kórshiles Mańǵystaý, Atyraý óńirlerindegi baýyrlarymyzǵa shóp jetkizý máselesimen de ainalysyp jatyrmyz. Oǵan qosa ózimiz de qapyda qalmaiyq dep, kúzge deiin keminde 1,5 áitpese, 2 norma kóleminde qystyq azyq daiyndaý týraly tapsyrma berdik. Biraq naryqtyń aty – naryq. Byltyr da sondai jaǵdailar bolǵan. Keibir sharýa qojalyqtary daiyndaǵan jemshópti aqshaǵa qyzyǵyp, satyp jibergen. Qys uzaryp ketip, solardyń keibiri shyǵynǵa ushyrady. Sol sebepti sharýa qojalyqtaryna áýeli óz daiyndyǵyńyzdy qamdap, sodan keiin ǵana satýdy oilańyzdar dep aityp otyrmyz. Meniń oiymsha, biylǵy kóktem birazyna sabaq boldy», - degen oblys ákimi búginde Aqtóbe oblysyndaǵy iri qara men jylqy sany keńes kezindegi mólsherden artyp ketkenin aitty.
«Mal azyǵyn daiyndaýǵa qarjylai qoldaý kórsetip otyrmyz. Tehnika satyp alýǵa respýblika boiynsha 25 paiyz sýbsidiia tólense, biz óz biýdjetimizden ústine 10 paiyz qosyp berdik. Byltyr 19,2 mlrd teńge bolsa, biyl 20 mlrd teńgeden asyp ketti. Qazir aýyl sharýashylyǵy salasynda myńdaǵan joba iske asyrylýda. Kásipkerlerdiń arasynda mal ósirýge, sút pen et óńdeýge, kókónispen, baý-abqashmen, qaýyn-qarbyzben ainalysýǵa qyzyǵýshylyq joǵary. Osyndai yntalandyrýdyń arqasynda 30 jyldyń ishinde jylqy sany - eki ese, iri qaranyń sany 8 paiyzǵa ósken», - dedi Ońdasyn Orazalin.
