Aqtóbe qalasy ákiminiń orynbasary Jangeldi Áýbákirov jáne qalalyq turǵyn úi-kommýnaldyq sharýashylyq bólimi basshysynyń mindetin atqarýshy Nurlan Dosov 7 jylǵa bas bostandyǵynan aiyryldy, dep habarlaidy "Ult aqparat".
Aqtóbe qalalyq № 2 sotynda qala ákiminiń orynbasary Jangeldi Áýbákirov, qalalyq turǵyn úi – kommýnaldyq sharýashylyq bólimi basshysynyń mindetin atqarýshy Nurlan Dosov, merdiger mekeme basshysy S.Janasbaev, bas esepshi D.Dúisembi, jeke kásipker N.Mustafinge qatysty qylmystyq isti qarady.
Olarǵa Qylmystyq kodekstiń «Bilikti nemese laýazymdyq ókilettikterdi asyra paidalaný» baby boiynsha aiyp taǵyldy.
Is materialyna súiensek, 2019 jyly qarasha aiynda Aqtóbe qalasy ákiminiń orynbasary J.Ábýbákirov jáne qalalyq turǵyn úi-kommýnaldyq sharýashylyq bólimi basshysynyń mindetin atqarýshy Nurlan Dosovqa ózi tańdap alǵan «KDS-Astana» JShS-men qalany jańa jyldyq bezendirýge memlekettik satyp alý týraly shart jasaýǵa jáne oryndalǵan jumys aktisine qol qoiýǵa nusqaý bergen.
Dosov zańsyz nusqaýlardy oryndap, seriktestik shotyna 100 mln teńge aýdarǵan.
«KDS-Astana» JShS basshysy S.Janasbaev pen bas býhgalteri D.Dúisembi óz tarapynan Dosovqa shartqa jáne oryndalǵan jumystar aktisine qol qoiýǵa járdemdesken.
Qarjyny qolma-qol aqshaǵa ainaldyrý maqsatynda S.Janasbaev «Mýstafin N.K» jeke kásipkerimen birge qalany bezendirý úshin taýar jetkizýge shart jasap, 60 mln teńge aýdarǵan.
Taýar jetkizilmegen. Qylmys saldarynan memleketke 90 426 475 teńge zalal keldi.
«Sot N.Dosov pen J.Ábýbákirovtiń kásibi antty buzýyn jazasyn aýyrlatatyn mán-jai retinde tanydy. Janasbaev, Dúisembi jáne Mustafinge qatysty aiyptaý aktisinde aýyrlatatyn mán-jailar kórsetilmegen. Sot óz bastamasy boiynsha olardy anyqtaýǵa quqyly emes. Zańnyń aitylǵan talaptaryn negizge ala otyryp, kelgen ziiannyń ótelmegenin eskerip, sot Dosov pen Ábýbákirovti 7 jylǵa, Janasbaev pen Mustafindi 5 jylǵa bas bostandyǵynan aiyrý jazasyn taǵaiyndady. Dúisembige 6 jylǵa bas bostandyǵynan aiyrý jazasyn taǵaiyndady. Onyń jas balasy bolýyna bailanysty jazasyn óteýdi 5 jylǵa keiinge qaldyrdy. Úkim zańdy kúshine engen joq», - dedi Aqtóbe qalalyq № 2 sotynyń baspasóz qyzmeti.
