Aqtóbe oblystyq bilim basqarmasynyń basshysy Joldas Batyrhan oqýshyǵa zorlyq kórsetý deregine qatysty túsinik berdi, dep habarlaidy "Ult aqparat".
Buǵan deiin habarlaǵanymyzdai, isti qazir oblystyq politsiia departamenti №3 qalalyq politsiia bóliminiń tergeý toby tergep jatyr.
Oblystyq bilim basqarmasynyń basshysy Joldas Batyrhan osy iske qatysty túsinik berdi.
«Biyl 29 naýryz kúni Aqtóbe qalasyndaǵy orta mekteptiń 1-klass oqýshysy A.A-nyń anasy A.D joǵary klass oqýshylary balasynyń qulaǵyn tartyp, saýsaǵyn qaiyryp, qorqytqany jóninde direktorǵa shaǵym aitqan. Oqiǵanyń mán-jaiyn anyqtaý barysynda bala ózine tiisken oqýshylardyń kim ekenin anyqtap aita almaǵan. Mektep basshylyǵyna shaǵymmen barǵan ata-ana zorlyq deregi týraly múldem aitpaǵan. Degenmen 2021 jyldyń 31 naýryzy kúni balanyń anasy Aqtóbe qalasyndaǵy №3 politsiia bólimine aryzdanyp, joǵarǵy klass oqýshylarynyń balasyna azǵyndyq áreket jasaǵanyn baiandaǵan. Mektep ákimshiligi bul týraly politsiia bóliminde estidi. Sonymen qatar politsiia bólimine shaqyrylǵan pedagogtardyń barlyǵy qupiiany saqtaityny jóninde qolhat beredi. Aryz boiynsha qylmystyq is tirkelip, sot-meditsinalyq saraptama taǵaiyndalady. Alǵashqy saraptamanyń qorytyndysy boiynsha zorlyq faktisi anyqtalmaǵan. Keiin balanyń aýrý tarihy boiynsha qosymsha sot-meditsinalyq saraptama taǵaiyndaldy. Qorytyndysy áli shyqqan joq», - dedi Joldas Batyrhan.
Onyń aitýynsha, mekteptiń 3 oqýshysy kúdikti retinde tergeýge alyndy.
«Balanyń ata-anasy jeke psihologqa júginetinin alǵa tartyp, mektep psihologynyń qyzmetinen bas tartqan. Ata-ana meniń jeke qabyldaýymda boldy. Bala ata-ananyń ótinishimen qashyqtan oqýǵa aýystyryldy. Tergeý amaldary aiaqtalyp, atalǵan fakt tolyq dáleldengennen keiin ǵana mektep ákimshiligine qatysty shara qoldanylady. Másele oblys ákiminiń tikelei baqylaýynda. Eger derek rastalsa, mektep ákimshiligi men qyzmetkerler jumysynyń olqylyǵy anyqtalsa, qatań sheshim qabyldanady. Olardyń jumys isteýine moraldyq turǵyda quqyǵy bolmaidy», - dedi Aqtóbe oblystyq bilim basqarmasynyń basshysy Joldas Batyrhan.
Aityp óteiik, oqiǵa bolǵan mekteptegi 2 beinekamera 17 naýryzdan bastap isten shyqqan.
Tehnikalyq qyzmet kórsetýshi jeke kásipker qatty diskilerdi jóndeýge alyp ketken.
Maýsym aiynan bastap beinekameralar iske qosyldy.
Oblystyq bilim basqarmasynyń habarlaýynsha, qazirgi kezde oblystaǵy 405 mekteptiń barlyǵynda kamera bar. Bári tolyq jumys istep tur.
