El Táýelsizdiginiń 30 jyldyǵyna orai, Aqtaý qalasy ákiminiń tapsyrmasyna sáikes jáne 25425 áskeri bólimshesi basshylyǵynyń qoldaýymen qaladaǵy alǵashqy «Melovoi» maiaginiń shamy qaita jandy, dep habarlaidy "Ult aqparat".
Bul maiak - álemdegi turǵyn úilerdiń ústinde ornalasqan sanaýly shamshyraqtyń biri.
Teńiz deńgeiinen 73 metr biiktikte, al, turǵyn úidiń 11 qabatynda ornalasqan munaranyń jalpy biiktigi 10 metr.
1974 jyly ornalasqan maiak 2011 jyly isten shyǵyp, ornyna ýaqytsha zamanaýi jaryq beretin qurylǵy qosylǵan.
Búginde teńizdegi kemelerdiń júrý qaýipsizdigin qamtamasyz etetin Aqtaýdyń boitumaryna ainalǵan nysan el azamattarynyń aralasýymen qaita jarqyrady.
Shara áskeri orkestrdiń súiemeldeýimen saltanatty túrde ashylyp, El Táýelsizdiginiń 30 jyldyǵyna orai 30 dana otshashý atyldy.
Shamdardy «AEJB» MKK mamandary iske qosyp, ári qarai úzdiksiz turaqty janyp turýyn qadaǵalaý jáne tótenshe jaǵdaidyń aldyn alý maqsatynda 24 saǵat áskeri qyzmetkerdiń baqylaýynda bolady.
Osylaisha, túnde teńizshilerge 50 jylǵa jýyq tarihy bar shamshyraq áskeri teńizshilerdiń baqylaýymen úzilissiz baǵyt kórsetpek.
