Mańǵystaý oblysynyń investitsilar jáne týrizmdi damytý basqarmasy men oblystyq kásipkerler palatasynyń qoldaýymen Aqtaýdaǵy qoǵamdyq oryndar men áýejaiǵa «Visit Mangystau» logotipi men týristerge arnalǵan QR-kodtary bar arnaiy tablolar ornatyldy, dep habarlaidy "Ult aqparat".
Bastama «Visit Mangystau» jobasy aiasynda júzege asty. Bul týraly Aqtaý qalalyq kásipkerlik jáne aýyl sharýashylyǵy bóliminiń basshysy Tilegen Edigeev málim etti.
Onyń aitýynsha, bul joba qonaqtardy aimaqpen tanystyrýǵa baǵyttalǵan. Jasalǵan jolsilteme týristerge qala mádenieti men tarihyn bilýge kómektesedi.
Sondai-aq, aialdamalarda QR-kodtarymen qosa Mańǵystaý oblysy men Aqtaý qalasynyń eń úzdik 5 oryndary kórsetilgen sýretter ornatyldy.
Endigi kezekte qala aýmaǵyndaǵy birqatar qonaq úide Mańǵystaýdyń kórikti jerleri týraly beinerolikter kórsetiledi.
«Mańǵystaý oblysy boiynsha eń úzdik dep ázirge Bozjyra, Tuzbaiyr sory, Qaraqiia oipaty, Airaqty-Shomalai jáne Sherqala taýy tanyldy. Al, qala boiynsha 15 shaǵynaýdan teńiz jaǵalaýy, Jartasty soqpaq pen «Akvariýs» sý asty álemi, 1 b shaǵyn aýdanyndaǵy sýdaǵy oiyn-saýyq pen demalys orny jáne Ábish Kekilbaev atyndaǵy tarihi-ólketaný murajailary belgilendi», - deidi Tilegen Edigeev.
QR-kodtaǵy jolserik arqyly ár týrist Aqtaý qalasynyń tarihymen tanysa otyryp, qonaq úilerge, kinoteatrlar men drama teatryna, meiramhanalar men kafelerge adaspai barýǵa múmkindik alady.
