Qazaqstan politsiiasy kúnine orai Aqtaý qalasyndaǵy №21 jalpy bilim beretin orta mektepte qyzmet babynda qaza tapqan politsei Ádilet Tursynbekovke arnalǵan erlik taqtasy ashyldy, dep habarlaidy "Ult aqparat".
Ádilet Tursynbekov 1986 jyly 23 qazanda Mańǵystaý oblysynyń Aqtaý qalasynda dúniege kelgen.
1993 jyly qaladaǵy №21 mekteptiń birinshi synybyna qabyldandy. Mektep qabyrǵasynda jáne joǵarǵy oqý oryndarynda oqyǵan kezderinde qoǵamdyq jumystarǵa, túrli sporttyq jarystarǵa belsene qatysqan.
2004 jyly atalǵan mektepti bitirip, Almaty qalasyndaǵy Qazaqstan Respýblikasy IIM Akademiiasyna kúndizgi bólimge oqýǵa túsken.
2008 jyly Akademiiany zańger mamandyǵy boiynsha bitirip, Mańǵystaý oblysy Ishki ister departamentine qyzmetke ornalasty.
Ádilet Aqtaý qalasy IIB tergeý bóliminiń tergeýshisi, IID uiymdasqan qylmyspen kúres basqarmasynyń jedel ýákili laýazymynda qyzmet atqarǵan.
2011 jyly politsiia aǵa leitenanty Ádilet Tursynbekov qyzmet babynda qaitys boldy.
Erlik taqtasynyń ashylýyna PD bastyǵynyń orynbasary, politsiia polkovnigi Bolatbek Aqshaýov, Ádilettiń anasy, dostary jáne ustazdary qatysty.
Sonymen qatar búgin qoldaryna diplom alǵan akademiia túlekteri de bul ádemi kórinistiń kýási boldy.
Shara qatysýshylary Ádilet Tursynbekovtyń qurmetine bir minýt únsizdik jariialady.
Batyrdyń anasy men PD bastyǵynyń orynbasary erlik taqtasynyń qyzyl lentasyn kesip, eske alý buryshy saltanatty túrde ashyldy.
«Ádilet - óte tájiribeli, óz isine jaýapkershilikpen qarap, jumysyn súiispenshilikpen atqarǵan áriptesterimizdiń biri edi. Búgin erlikpen qaza tapqan áriptesimizdiń qurmetine 10 jyl bilim alǵan ordasynan erlik taqtasyn ashyp otyrmyz. Beibit kúnniń batyrlaryna ainalyp, azamattardyń qaýipsizdigi úshin janyn qiǵan áriptesimizdiń erligi árqashan jadymyzda saqtalady. Keler urpaq úshin olardyń batyrlyǵyn miras etip jetkizý - bizge mindet», – dedi Bolatbek Aqshaýov.
