Aqtaýda politseiler jas jigitti kúshpen alyp ketpek bolǵan. Biraq olarǵa bir top áiel tap berdi. Mańǵystaý oblystyq politsiia departamenti jelide taraǵan videoǵa túsinikteme berdi, dep habarlaidy Sputnik Qazaqstan Lada.kz saityna silteme jasap.
Videoda birneshe politsei aldymen eki adamdy aiyrýǵa tyrysady. Odan keiin bireýiniń qolyn qaiyryp, alyp ketýge áreket jasaidy. Jas jigit bolsa, kameraǵa tilin shyǵaryp kúledi. Al ony patrýldik kólikke otyrǵyzyp jatqanda bir top áiel aralasyp, jigitti ustap qalmaq bolǵan.
"Mynany qarańyz, balanyń kiltin jaidan-jai alyp qoiǵysy kelip otyr", - deidi video avtory.
Videonyń sońynda aq jeide kigen taǵy bir jigit patrýldik kólikke qarai umtylady. Biraq politsiia qyzmetkeri ony keri qaitarady.
Resmi málimetke sáikes, bul oqiǵa 1 shilde kúni Aqtaý qalasynyń 3B shaǵyn aýdanynda bolǵan. Patrýldik politsiia jol qozǵalysy erejesin buzǵan Chevrolet Lacetti kóligin toqtatty. Al qujatty tekserý kezinde kólik júrgizýshisiniń mas kúiinde bolǵany anyqtaldy.
"Politseiler jas jigitke kólikten shyǵyp, jolaýshy oryndyǵyna otyrýǵa ótinish jasady. Sebebi kólik júrgizýshisi mas kúiinde rólge otyrdy degen kúdik boldy. Biraq ol kiltti politsiiaǵa bermei qoiǵan", - deidi departament qyzmetkerleri.
Meditsinalyq tekseris kezinde jas jigittiń jeńil kúide mas bolǵany anyqtaldy. Ákimshilik sot ony 7 jylǵa kólik júrgizý quqyǵynan aiyrdy. 15 táýlikke qamaýǵa alý týraly sheshim qabyldady.
