Florida shtatynda kámeletke tolmaǵan bala bir jasar qyzdy atyp óltirip, onyń eki jasar ápkesin jaralaǵan. Osy oqiǵadan soń qarý qoldanǵan balanyń ákesi qamaýǵa alyndy, dep habarlaidy QazAqparat ABC News basylymyna silteme jasap.
Politsiianyń málimetinshe, senbi kúni keshke balanyń ákesi 45 jastaǵy Roderik Dýein Rendall Pensakola qalasyndaǵy qonaqúiden shyǵyp, qarýyn shkafta qaldyryp ketken. Onyń 8 jastaǵy uly qarý turǵan jerdi bilgen. Bala qarýdy alyp, oiyn barysynda bir jasar qyzdy atqan, oq qyzdyń denesinen ótip, onyń eki jasar ápkesin jaralaǵan. Bólmedegi tórtinshi bala zardap shekken joq.
Qaza tapqan qyz ben onyń jaralanǵan ápkesi atys bolǵan sátte qonaqúidiń sol bólmesinde uiyqtap jatqan jáne olar Rendalldyń tanys áieliniń qyzdary bolǵan.
Tergeýshilerdiń aitýynsha, qaityp oralǵan Rendall, politsiia qyzmetkerleri kelgenshe bólmeden tapansha men esirtkini alyp, qylmysty jasyrmaq bolǵan.
Balanyń ákesi aiǵaqtardy burmalady, salǵyrttyq tanytty jáne atys qarýyn saqtaý erejesin buzdy degen aiyppen qamaýǵa alyndy. Rendall buǵan deiin 14 aýyr qylmys jasaǵany úshin sottalǵan bolatyn. Qazirgi ýaqytta Eskambiia okrýginiń túrmesine qamaldy.
