Qazaqstan politsiiasy kúni qarsańynda Aqmola oblysynyń Shýche qalasynda qyzmettik mindetterin oryndaý kezinde qaza tapqan politsiia qyzmetkerleri Qanat Otarbaev pen Qanat Hamidýllinniń qurmetine monýment ornatyldy, dep habarlaidy "Ult aqparat". oblystyq PD baspasóz qyzmetine silteme jasap.
Karantindik sharalardy saqtai otyryp ótken monýmenttiń ashylý saltanatyna jinalǵandar qaza tapqan politseilerdi bir minýt únsizdikpen eske aldy.
Sharaǵa Aqmola oblysy politsiia departamentiniń bastyǵy, politsiia general-maiory Armanbek Baimýrzin, Býrabai aýdanynyń ákimi Áset Muzdybaev, qaza bolǵandardyń týystary, aýdandyq politsiia bóliminiń qyzmetkerleri jáne ishki ister organdarynyń ardagerleri qatysty.
«Politsiia departamentiniń jeke quramy qyzmettik boryshyn oryndaý kezinde qaza tapqan joldastaryn eske alady. Biz ishki ister organdarynda laiyqty qyzmet atqarǵan áriptesterimizdi maqtan tutamyz. Qanat Otarbaev politsiiada 16 jyl, Qanat Hamidýllin 12 jyl qyzmet etti. Olardyń kásibiligi, óz jumysyna adaldyǵy-erlik pen ar-namystyń úlgisi», - dep atap ótti politsiia bóliminiń basshysy.
Osy rette Armanbek Baimýrzin qaza tapqan qyzmetkerlerdiń jesirlerine turǵyn úidi jekeshelendirý týraly kelisimshart tapsyrdy.
Sonymen birge, ol qaza tapqan politseilerdiń otbasylary árdaiym kómek pen qoldaýǵa sene alatynyn atap ótti.
Eskertkish ornatý jumysyn uiymdastyrýǵa qatysqandardyń bárine alǵysyn jetkizdi.
Býrabai aýdanynyń ákimi qaitys bolǵan ofitserlerdiń ata-analaryna óz eliniń naǵyz azamattaryn laiyqty tárbielegeni úshin rizashylyǵyn bildirdi.
Qaza tapqan politseilerdiń týystary departament basshylyǵyna, jergilikti atqarýshy organdarǵa olardyń otbasylaryna kórsetken qoldaýy men yqylasy úshin rizashylyǵyn bildirdi.
Shara sońynda politsiia departamentiniń bastyǵy, Býrabai aýdanynyń ákimi, Ishki ister organdarynyń ardagerleri, aýdandyq politsiia bóliminiń qyzmetkerleri, marqumdardyń týystary men jaqyndary eskertkishke gúl shoqtaryn qoidy.
Aita keteiik, osydan segiz ai buryn kezekti shaqyrýǵa baryp kele jatqan ýchaskelik inspektorlar jol-kólik oqiǵasy saldarynan kóz jumdy.
