Aqmola oblysynda «Úzdik pedagog» baiqaýynyń jeńimpazy 800 myń teńgeniń syiaqysyna ie boldy, dep habarlaidy "Ult aqparat" oblystyq bilim basqarmasynyń baspasóz qyzmetine silteme jasap.
Vedomstvonyń málimetinshe, pedagog kásibiniń mártebesin arttyrý jáne kásibi qyzmette joǵary jetistikteri bar shyǵarmashyl pedagogterge syiaqy berý maqsatynda Aqmola oblysynyń bastaýysh, negizgi jáne jalpy orta bilim berý uiymdarynyń pedagog qyzmetkerleri arasynda «Úzdik pedagog» syrttai baiqaýynyń oblystyq kezeńi ótkizildi.
Shyǵarmashylyq saiysqa bastaýysh, negizgi jáne jalpy orta bilim berý uiymdarynyń 21 pedagogy qatysty.
Baiqaýǵa qatysý úshin pedagogter kelesi konkýrstyq materialdardy usyndy: «Meniń júregimdegi mektep» beinerolik, beinesabaq, esse, portfolio.
Baiqaý qorytyndysy boiynsha bastaýysh, negizgi jáne jalpy orta bilim berý uiymdarynyń pedagog qyzmetkerleri arasynda «Úzdik pedagog» ataǵy jáne 875 100 teńge aqshalai syiaqy Jaqsy aýylyndaǵy №1 jalpy orta mekteptiń qazaq tili men ádebieti pániniń muǵalimi Lázzat Qasqaevaǵa berildi.
«Mundai baiqaýǵa alǵash ret qatysyp otyrmyn. Aldymen aýdandyq deńgeide gran-pri jeńip aldym. Meniń jumystarym oblysqa jiberildi. Árine, jeńis men úshin tosynsyi boldy! Óitkeni, men aýdandyq mektepti tanystyrdym jáne baiqaýǵa oblystyń barlyq mektepteri, sonyń ishinde qalalyq mektepter qatysatynyn túsindim. Qýanyshymdy sózben aityp jetkizý múmkin emes!» - dedi jeńimpaz.
Jaqsy aýylyndaǵy №1 jalpy bilim beretin mektepte Lázzat Qasqaeva 2002 jyldan beri 19 jyldai eńbek etip keledi. Dál sol kezde ol jubaiymen birge Soltústik óńirge Almatydan kóship kelgen. Qazir mektepte ol qazaq tilinen sabaq berip qana qoimai, tárbie isi jónindegi meńgerýshi bolyp jumys isteidi.
Sonymen birge, baiqaýda 20 qatysýshy Aqmola oblysy bilim basqarmasy basshysynyń gramotalarymen marapattaldy.
