Aqmola oblysynyń Atbasar aýdanynda jasóspirimderdiń terek mamyǵyn jaǵyp oinaýy saldarynan avtobýs parkiniń jabyq turaǵy órtendi, dep habarlaidy "Ult aqparat".
Oblystyq politsiia departamenti baspasóz qyzmetiniń málimetinshe, Atbasar APB kezekshi bólimine jergilikti kólik kásiporny direktorynan avtobýs parkiniń jabyq turaǵynyń órtengeni týraly aryz tústi. Shyǵyn somasy 3 million teńge kóleminde baǵalandy.
«Oqiǵa ornyna kelgen politsiia qyzmetkerleri 16 jáne 17 jastaǵy eki jasóspirimniń terek mamyǵyn tutatýy kesirinen kásiporyn qorshaýynyń bir bóligi órtengenin anyqtady. Qorshaýdan shyqqan órt keiinnen avtobýs parkiniń turaǵynyń tóbesine jaiyldy», - dep túsindirdi vedomstvodan.
Osyǵan bailanysty Qylmystyq kodekstiń 204 baby 2-shi bóligi «bóten múlikti abaisyzda joiý nemese búldirý» boiynsha sotqa deiingi tergeý sharalary júrgizilýde.
Osy rette, tártip saqshylary ata-analardy balalaryna baqylaýdy kúsheitýge jáne jazǵy demalys kezinde olardyń bos ýaqytyn tiimdi ótkizýge shaqyrady.
