Stock Photo
Aqmola oblysynda sýrrogat ana men erli-zaiypty arasyndaǵy daý sotta qaralyp, is ishinara ǵana qanaǵattandyryldy, dep habarlaidy Ult.kz.
Is materialdaryna sáikes, erli-zaiypty 2024 jyly sýrrogat ana qyzmetine júginip, azamatsha D.-men kelisimshart jasasqan. Shart boiynsha eki ret uryqtandyrý áreketi josparlanǵan. Alaida alǵashqy áreket nátijesiz aiaqtalsa, ekinshisi D.-nyń kelmeýine bailanysty múlde ótpei qalǵan.
Osy aralyqta erli-zaiypty sýrrogat anaǵa 500 myń teńgeden astam qarajat aýdarǵan. Keiin olar embriondy saqtaý týraly kelisimdi toqtatyp, sotqa júginedi. Talapta jumsalǵan shyǵyndy qaitarý jáne moraldyq ziiandy óteý suralǵan.
Birinshi satydaǵy sot talapty ishinara qanaǵattandyryp, 550 myń teńge materialdyq shyǵyn men qosymsha shyǵystardy óndirýdi, sondai-aq 500 myń teńge moraldyq ótemaqy tóleýdi mindettegen.
Alaida oblystyq sot bul sheshimdi ózgertip, moraldyq ziiandy óteý bóligin alyp tastady. Sottyń paiymynsha, jaýapker tek qarjylyq mindettemelerdi buzǵan, al moraldyq ziian keltirgeni dáleldenbegen.
Sonymen qatar, embrionnyń joiylýyna sýrrogat ananyń qatysy bary da rastalmady. Bul sheshimdi erli-zaiypty ózderi qabyldaǵan.
Qorytyndysynda, sot D.-ny tek materialdyq shyǵyndy óteýge mindettedi. Sheshim zańdy kúshine endi.
