Foto: Pexels
Aqmola oblysynyń Stepnogorsk qalasynda 5 jasar bala kópqabatty úidiń altynshy qabatyndaǵy terezeden qulap, qaza tapty. Dárigerler ony aman alyp qalý múmkin bolmaǵan, dep habarlaidy Ult.kz.
Oqiǵa 13 sáýir kúni bolǵan. Aldyn ala málimet boiynsha, 2020 jyly týǵan bala páterdiń terezesinen qulap ketken. Aýyr jaraqat alǵan bala dereý aýrýhanaǵa jetkizilgenimen, ómirin saqtap qalý múmkin bolmady.
Aqmola oblystyq politsiia departamenti atalǵan fakti boiynsha sotqa deiingi tergeý júrgizip jatqanyn habarlady. Qazirgi tańda oqiǵanyń barlyq mán-jaiy anyqtalýda.
Politsiianyń málimetinshe, mundai jazataiym jaǵdailar kóbine kún jylynǵan kezeńde jiileidi. Negizgi sebepter retinde eresekterdiń baqylaýsyz qaldyrýy, ashyq tereze jáne balalardyń tereze mańyna shyǵýyna múmkindik beretin jihazdar atalady.
Biyl oblysta balalardyń terezeden qulaýyna qatysty bes jaǵdai tirkelgen, olardyń bireýi qaiǵyly aiaqtalǵan.
Quqyq qorǵaý organdary ata-analardy balalardyń qaýipsizdigine erekshe mán berýge shaqyryp otyr. Mamandar masaǵa qarsy torlarǵa senbeýge keńes beredi, sebebi olar balanyń salmaǵyn kótere almaidy.
Sondai-aq terezege arnaiy qulyptar ornatý, ashylýyn shekteitin qurylǵylar paidalaný jáne balalardyń tereze mańynda oinaýyna jol bermeý usynylady.
