Almaty oblysynda aýyldyq okrýg ákimderiniń sailaýyna saiasi partiialardan jáne ózin-ózi usyný arqyly 279 úmitker usynylǵan. Bul týraly Almaty oblysy ákiminiń baspasóz qyzmeti habarlady.
Ortasha básekelestik deńgeii 3,9 adamnan keledi. Usynylǵan 279 úmitkerdiń 249-y - er, 30-y - áiel azamatshalar. Úmitkerlerdiń ortasha jasy - 41,3 jas. Bul týraly búgin Taldyqorǵanda óńirdegi aýyldyq okrýgterdiń ákimderine úmitkerlerdi usyný qorytyndylary týraly ótken brifing barysynda oblystyq aýmaqtyq sailaý komissiiasynyń múshesi Qaharman Jaqsylyq aitty .
Qaharman Jaqsylyqtyń sózine súiensek, jalpy Almaty oblysynda 71 aýyldyq okrýgte ákimder sailaýy ótedi. Bul rette 60 ákim ókilettik merziminiń aiaqtalýyna bailanysty, 11-i ókilettikterin merziminen buryn toqtatýǵa bailanysty sailanady. Óz kandidattaryn usynǵan saiasi partiialar qatarynda «Nur Otan» partiiasy, «Aýyl» HDPP, «Aq Jol» QDP, «ADAL» SP, QHP, JSDP bar.
«Usynylǵandar arasynda 154 úmitker - jumys istep júrgen memlekettik qyzmetshiler, 32-i - kommertsiialyq qurylymdardyń ókilderi, 70-i - biýdjettik uiymdardyń qyzmetkerleri, 10-y ýaqytsha jumys istemeidi, 3-i - qoǵamdyq birlestikterdiń ókilderi, 6-y - ózin-ózi jumyspen qamtyǵandar, 3-i ishki ister jáne áskeri salalardyń zeinetkerleri. Arasynda ǵylymi dárejesi bar kandidat ta bar», - dedi Q. Jaqsylyq.
Biylǵy jylǵy 10 shildedegi derek boiynsha 159 úmitker tirkelgen (56,6%).Túrli sebepter boiynsha 23 úmitker alynyp tastaldy, onyń 16-sy talaptarǵa sáikes kelmeidi, 7-i óz kandidatýrasyn alyp tastaý týraly ótinishterine sáikes shyǵaryldy.
Eske salsaq, 25 mamyrda Prezident Qasym-Jomart Toqaev sailaý týraly Konstitýtsiialyq zańǵa ózgertýler men tolyqtyrýlar engizýdi kózdeitin qujatqa qol qoiǵan bolatyn.
