QR Aqparat jáne qoǵamdyq damý ministri Aida Balaeva mektep oqýshylaryn oqý jylynyń aiaqtalýymen quttyqtady, dep habarlaidy "Ult aqparat".
«25 mamyrda dástúr boiynsha mektep oqýshylary men muǵalimder oqý jylynyń aiaqtalýyn atap ótedi. Al túlekter bilim jáne tárbieniń besigine ainalǵan altyn uia mektebimen qoshtasyp, san taraýly ómir jolyna aiaq basady. Ókinishke orai, biyl balalardyń kópshiligi sońǵy qońyraý únin estimeidi, koronavirýs pandemiiasy adam josparlaryna túzetýler engizdi», - dep jazdy ministr Facebook-paraqshasynda.
Vedomstvo basshysy sonymen qatar, elimiz úshin osynaý qiyn kezeńde, basqa da mańyzdy mamandyqtar sanatynda ustaz eńbeginiń qadirin de, aýyrtpalyǵyn da, mańyzyn da kóptegen qazaqstandyqtar tereń sezingenin basa tap ótedi.
«Osy oraida, ózimniń de asyl ustazdarym, maǵan bilimmen birge, tálim-tárbie bergen Almaty oblysynyń Jambyl orta mektebiniń muǵalimderine alǵysymdy bildiremin. Mektep qabyrǵasynan muǵalimderimniń eńbeginiń arqasynda qalyptasqan qasietter maǵan maqsattaryma jetýge, óz kásibimdi adaspai tabýǵa, jemisti jumys isteýge jáne ómir boiy izdeniste bolýǵa múmkindik berdi. Elimizdiń barlyq túlekterin oqý jylynyń aiaqtalýymen quttyqtaimyn jáne mamandyq tańdaýda óte muqiiat bolýǵa keńes beremin. Kásip - ómirlik rýhani da azyq. Adam óziniń súiikti isimen ainalysqan kezde ǵana baqytty bola alady. Maqsat qoiyńyz, eńbekqor, tártipti jáne maqsatty bolyńyz, sonda barlyq armandar oryndalady!», - dedi Aida Balaeva.
