Foto: Zakon.kz
QR Premer-ministriniń orynbasary – Mádeniet jáne aqparat ministri Aida Balaeva jýrnalist Botagóz Omarovanyń ustalýyna qatysty pikir bildirip, atalǵan jaǵdai ministrliktiń baqylaýynda ekenin málimdedi dep habarlaidy Ult.kz.
Ministrdiń aitýynsha, mundai isterde zańda kózdelgen barlyq rásimder aiaqtalǵanǵa deiin asyǵys qorytyndy jasap, aldyn ala baǵa berýge bolmaidy. Bul oqiǵanyń mán-jaiyn burmalaýǵa nemese protseske qatysýshylardy negizsiz aiyptaýǵa ákelýi múmkin.
Sondai-aq ol taratylyp jatqan aqparattyń durystyǵyn tekserý jýrnalisterdiń negizgi mindetteriniń biri ekenin eske saldy. Bul talap «Mass-media týraly» zańda naqty kórsetilgen.
Balaeva zańnamada jýrnalisterdi shyndyqqa sáikes kelmeitin aqparat taratqany úshin jaýapkershilikten bosatatyn jaǵdailar da qarastyrylǵanyn atap ótti. Atap aitqanda, resmi málimdemelerdi sózbe-sóz, ózgerissiz keltirý mundai jaǵdailardyń qataryna jatady.
Ministrdiń sózinshe, kez kelgen máseleni qaraý barysynda «Zań jáne tártip» qaǵidaty qatań saqtalýy tiis.
Qazirgi ýaqytta Mádeniet jáne aqparat ministrligi jaǵdaidy baqylap otyr. Qajet bolǵan jaǵdaida vedomstvo óz quzyreti aiasynda tiisti sharalar qabyldaýǵa daiyn. Sonymen qatar barlyq protsessýaldyq áreketter zańnama talaptaryna sáikes, syrtqy aralasýsyz júrgizilýi tiis ekeni atap ótildi.
