Foto: ashyq derekkóz
Qostanai qalasynda memlekettik sýbsidiialardy jymqyrý jáne qylmystyq jolmen alynǵan kiristerdi zańdastyrý faktisi boiynsha sot úkimi shyqty dep habarlaidy Ult.kz.
Isti Qostanai oblysy boiynsha Qarjylyq monitoring agenttiginiń departamenti tergegen. Tergeý málimetinshe, «Beef Export Group» JShS basshysy Parhomenko jetekshilik etken qylmystyq top sýbsidiialardy zańsyz alý shemasyn uiymdastyrǵan. Oǵan aýyl sharýashylyǵy basqarmasynyń laýazymdy tulǵalary, sondai-aq aýdandyq deńgeidegi aýyl sharýashylyǵy taýar óndirýshileri men veterinariialyq mamandar tartylǵan.
Qaskóiler iri qara maldy satyp alý jáne qaita óńdeý týraly jalǵan qujattar rásimdeý arqyly agroónerkásiptik keshendi damytýǵa arnalǵan memlekettik baǵdarlamalar aiasynda júieli túrde sýbsidiia alyp otyrǵan. Qarajat jalǵan jetkizilim retinde kórsetilip, aqparattyq júielerge engizilgennen keiin qolma-qol aqshaǵa ainaldyrylyp, keiin baqylaýdaǵy uiymdardyń shottaryna qaita aýdarylǵan.
Tergeý barysynda qylmystyq áreketterge zańdy sipat berý úshin jalǵan býhgalterlik qujattar jasalyp, olardyń negizinde qaita-qaita sýbsidiia alýǵa ótinim berilgeni anyqtaldy.
Nátijesinde memleketke 3 mlrd teńgeden astam zalal keltirilgen. Kúdiktiler tergeý barysynda 107 mln teńgeden astam qarajatty erikti túrde ótegen.
Sot úkimimen qylmystyq toptyń uiymdastyrýshysy Parhomenko 14 jylǵa bas bostandyǵynan aiyryldy. Sonymen qatar, toptyń 14 múshesine 6 jyldan 10 jylǵa deiingi merzimge bas bostandyǵynan aiyrý jazasy taǵaiyndaldy.
Sondai-aq jalpy quny 3 mlrd teńge bolatyn múlik tárkilendi. Onyń ishinde 1,3 mln AQSh dollary jáne 700 mln teńge bar.
Úkim ázirge zańdy kúshine engen joq.
