Qazaqstanda AES salynsa, mańaiyndaǵy halyq kóshirile me? QR Energetika ministri Maǵzum Myrzaǵalievke ortalyq kommýnikatsiialar qyzmetinde osyndai saýal qoiyldy, dep habarlaidy QazAqparat.
«AES týraly túrli boljamdardy aityp kettik. Buǵan deiin de elektr stansasyn salý óte uzaqqa sozylatyn úderis ekenin aittym. Árine, kez kelgen stansany salý úshin adam kerek. Ol stansaǵa qyzmet kórsetetin adamdar da qajet. Bul adamdar nysanǵa jaqyn mańda turǵany kerek. Bireýdiń ol jerden kóshkisi kelse, bireýdiń kerisinshe kóship barǵysy keletin shyǵar. Jalpy alǵanda, jańa stansamen birge salanyń tutas infraqurylymy, «qala quraýshy kásiporyn» paida bolady», - dedi ministr.
Onyń paiymynsha, ázirge AES salynatyn eldi mekennen halyqty basqa jerge qonystandyrý máselesin taqlyaýǵa áli erte. Óitkeni nysannyń qurylysyna ǵana 10-15 jyl ýaqyt kerek.
«Turǵyndardy jappai kóshirý máselesi qoiylmaityn shyǵar dep dep topshylaimyn. Taǵy da aitam, óitkeni bul – keleshektiń jobasy. Bul máseleni shamamen 10 jyldan keiin talqylaýymyz múmkin. Halyqty qonystandyrý boiynsha nemese jekelegen úilerdi kóshirý boiynsha memlekettik baǵdarlama bola ma, sol kezde kóreiik. Oǵan deiin áli ýaqyt kóp», - dedi Maǵzum Myrzaǵaliev.
