Foto: Kazatomprom
«Qazatomónerkásip» ulttyq atom kompaniiasy internettegi alaiaqtyq áreketterdiń kóbeigenin habarlady. Alaiaqtar áleýmettik jelilerde kompaniia basshylyǵynyń atynan sóilep, qarjylyq jaǵdaidy jaqsartýǵa múmkindik beretin platformalar týraly beinehabarlamalar taratýda. Olar azamattardyń qarjylyq jaǵdaiyn jaqsartýǵa ýáde beretin jalǵan platforma iske qosyldy dep málimdeidi, dep habarlaidy Ult.kz.
«Qazatomónerkásip» basqarma tóraǵasy Meiirjan Iýsýpov bul jańalyqtardyń shyndyqqa sáikes kelmeitinin resmi túrde málimdedi.
"Osyndai áreketterdiń saldarynan túrli áleýmettik jelilerde shyndyqqa sai kelmeitin málimetter taratylady. Mundai aqparattar kompaniia basshylyǵynyń atynan beriletin jalǵan beine habarlamalardan jáne qarjylyq jaǵdaidy jaqsartýǵa múmkindik beretin platformanyń iske qosylǵany týraly qyzmetkerlerdiń jalǵan pikirlerinen quralǵan. Habarlamalar shyndyqqa janaspaidy jáne tek alaiaqtyq maqsatta jasalǵan. Biz sizderdi múmkindiginshe sergek bolýǵa shaqyramyz. Qysqa merzimde jeńil jolmen joǵary tabys tabasyz degen ýádelerge, tekserilmegen aqparat kózderine senbeńizder jáne kúdikti siltemelerdi ashpańyzdar", - dep eskertti ol.
Kompaniia barlyq resmi aqparat tek resmi saitta jáne áleýmettik jelilerdegi resmi paraqshalarda jariialanatynyn eskertti.
«Qazatomónerkásip» azamattardy aqparatty tekserýge jáne senimdi derekkózderge ǵana júginýge shaqyrady. Bul alaiaqtardyń qarjylyq shyǵynǵa ushyratýynan saqtanýdyń birden-bir joly.
