Foto: new.mbukcsontgo.ru
Qazaqstanda internet-alaiaqtyqtan kelgen shyǵyn kólemi artyp, jańa antifrod-ortalyq alaiaqtarǵa jasalǵan aqsha aýdarymdaryn buǵattaýdy bastady. Byltyr bul ortalyq 967 million teńgeni únemdep qaldy. Bul týraly Ult.kz, Finprom.kz portalyna silteme jasap habarlaidy.
Ulttyq bank qurǵan málimet almasý ortalyǵy kúdikti aýdarymdardy anyqtap, olardy baqylady. Osylaisha jiberýshi jáne qabyldaýshy bankter arqyly buǵattaýǵa múmkindik berdi. 2024 jyldyń jeltoqsanyna deiin ortalyq 11,7 myń alaiaqtyq áreketti tirkedi, olardyń 65,5%-y quqyq qorǵaý organdarynyń aralasýymen anyqtaldy.
Alaiaqtar ortalyqtyń qyzmetkerleri retinde ózin tanystyryp, jeke málimetterdi alý nemese kúdikti siltemelerge ótýge shaqyryp aldaýdy uiymdastyrady.
"Antifrod-ortalyq málimetterinshe, tirkelgen alaiaqtyq áreketterdiń negizgi bóligin telefon arqyly aldaý (25,5%) bolǵan. Ekinshi orynda – jalǵan investitsiia usynystary (18,9%). Úshinshi orynda áleýmettik jeliler men messendjerlerdegi alaiaqtyq (17,6%). Sondai-aq jalǵan taýar satý, fishingtik saittar jáne basqa ádister arqyly jasalǵan qylmystar da tirkelgen", –delingen jazbada.
2023 jyly internet-alaiaqtar qazaqstandyqtardan 11,4 milliard teńge urlaǵan, bul ótken jylmen salystyrǵanda 2,8 ese kóp. Sonyń ishinde jeke tulǵalardan 11 millard teńge, zańdy tulǵalardan 385 million teńge, memlekettik uiymdardan 8,4 million teńge alynǵan. Qaitarylǵan qarajat kólemi 36,6% bolǵan. Al qalǵan qarajat qaitarylmaǵan.
