Foto: baq.kz
Qazaqstan Parlamenti Májilisiniń jalpy otyrysynda Májilis tóraǵasy Erlan Qoshanov jańadan qabyldanǵan Konstitýtsiiadan keiingi alǵashqy jalpy otyrys retinde tarihi mańyzyna toqtalyp, azamattardyń 87 paiyzy jańa Konstitýtsiiany qoldap daýys berýi – halyqtyń Prezident júrgizip otyrǵan baǵytqa degen seniminiń joǵary ekenin dáleldeidi, dep habarlaidy Ult.kz.
"Depýtattar Koalitsiia quramynda barlyq aimaqty aralap shyqty. Eńbek ujymdarymen kezdesip, aýyl-aýylda, aýdandar men qalalarda turǵyndarmen ashyq áńgime órbittik. Jańa Ata zań mátinin ázirleýge de áriptesterimiz bir kisidei atsalysty. Sol úshin búkil depýtattyq korpýsqa shynaiy alǵysymdy bildiremin. Keshe biraz depýtat tikelei Prezident qolynan joǵary nagrada aldy. Sondai-aq, saiasi partiialardyń da qosqan úlesin erekshe atap ótken jón. Jaýapty sátte bárimiz birge jumylyp, Memleket basshysyna qoldaý kórsete bildik", - dedi Erlan Jahanuly.
Erlan Qoshanov óz sózinde depýtattardyń bul protsestegi rólin erekshe atap ótti. Onyń aitýynsha, halyqpen tyǵyz bailanys ornatý maqsatynda depýtattar óńirlerdi aralap, eńbek ujymdarymen jáne turǵyndarmen kezdesýler ótkizgen. Osyndai ashyq dialog barysynda azamattardyń usynys-pikirleri eskerilip, jańa Konstitýtsiia jobasyn ázirleýge negiz bolǵan.
Sondai-aq, Májilis tóraǵasy depýtattyq korpýstyń, saiasi partiialardyń jáne jalpy qoǵamnyń birlese jumys isteýi nátijesinde mańyzdy tarihi sheshim qabyldanǵanyn aitty. Ol bul jetistikti ortaq jeńis retinde baǵalap, barsha qatysýshylarǵa alǵys bildirdi.
Alaida, spikerdiń aitýynsha, negizgi jumys endi ǵana bastalady. Memleket basshysy Konstitýtsiialyq reformalardy júzege asyrý jónindegi arnaiy Jarlyqqa qol qoiǵan. Osyǵan sáikes, aldaǵy ýaqytta Parlament aldynda aýqymdy zańnamalyq mindetter tur.
"Prezident, Quryltai, Halyq Keńesi, Astananyń mártebesi jáne elimizdiń ákimshilik-aýmaqtyq qurylysy týraly jańadan bes konstitýtsiialyq zań qabyldaimyz. Sonymen birge taǵy segiz konstitýtsiialyq zań men 60-tan astam túrli zańdarǵa túzetý engizýimiz qajet", - dedi ol.
Sonymen qatar, Prezidenttiń bastamasymen birqatar qylmystyq jáne ákimshilik quqyqbuzýshylyqtar boiynsha raqymshylyq jariialaý týraly zań jobasy da qaralady. Májilis bul qujattardy sessiia aiaqtalǵanǵa deiin qabyldaýdy kózdep otyr.
