Foto: QR MAM
Halyqaralyq áielder kúni qarsańynda Qazaqstan Respýblikasy Premer-Ministriniń orynbasary – Mádeniet jáne aqparat ministri Aida Balaeva Memleket basshysynyń atynan túrli salada eńbek etip júrgen áielderge memlekettik nagradalardy tabystady, dep habarlaidy Ult.kz.
Qazaqstan Respýblikasy Prezidenti Qasym-Jomart Toqaevtyń Jarlyǵymen ǵylym, mádeniet, aqparat, arhiv jáne mýzei isi salalarynyń, sondai-aq qoǵamdyq institýttardyń ókilderi eldiń damýyna qosqan eleýli úlesi úshin joǵary nagradalarmen marapattaldy.
Saltanatty is-sharada Aida Balaeva merekeniń airyqsha mańyzyn atap ótip, mundai marapattar qazaqstandyq áielderdiń eren eńbegine, olardyń kásibi jaýapkershiligi men óz isine degen adaldyǵyna kórsetilgen laiyqty qurmet ekenin aitty.
«Prezident Qasym-Jomart Toqaev el aldyndaǵy eleýli eńbekterińizdi joǵary baǵalap, sizderdi marapattaý týraly Jarlyqqa qol qoidy. Bul memleket áielderdiń qoǵamdaǵy rólin, olardyń otbasy qundylyqtaryn nyǵaitýǵa, túrli salalardyń damýyna qosqan úlesin árdaiym joǵary baǵalaitynynyń aiǵaǵy dep bilemin. Búgingi marapat sizderdiń jeke jetistikterińiz ǵana emes, otbasylaryńyzdyń, balalaryńyzdyń, ata-analaryńyzdyń, áriptesterińiz ben ózderińizben birge osy jolda kele jatqan ujymdaryńyzdyń ortaq eńbegine kórsetilgen qurmet», – dedi Aida Balaeva.
Úkimet basshysynyń orynbasary qazaqstandyq áielder qai kezeńde de qoǵamda airyqsha jasampaz ról atqaryp kele jatqanyn atap ótti. Onyń aitýynsha, jaýapkershiligi, iske degen uqyptylyǵy jáne shynaiy janashyrlyǵynyń arqasynda áielder kásibi qyzmette joǵary nátijelerge qol jetkizip, mádeni ári rýhani qundylyqtardy saqtaýǵa, qoǵamdyq institýttardy nyǵaitýǵa jáne memlekettiń damýyna eleýli úles qosyp keledi.
«Qurmet» ordenimen Sh. Ýálihanov atyndaǵy Tarih jáne etnologiia institýtynyń bólim basshysy Baqytjamal Aitmuhambetova, T. Shevchenko atyndaǵy memorialdyq mýzeidiń qor saqtaý jáne buqaralyq-ekskýrsiialyq jumys bóliminiń meńgerýshisi Aigúl Balabaeva, sondai-aq Semei qalasyndaǵy F. Dostoevskiidiń ádebi-memorialdyq mýzeiiniń bas qor saqtaýshysy Tatiana Titaeva marapattaldy.
«Eren eńbegi úshin» medalimen Ortalyq memlekettik ǵylymi-tehnikalyq qujattama arhiviniń direktory Baian Jumataeva, Konfessiiaaralyq jáne dinaralyq dialogty damytý jónindegi halyqaralyq ortalyqtyń bas ekonomisi Raýshan Imantaeva, Batys Qazaqstan oblystyq tarihi-ólketaný mýzeii janyndaǵy A. Pýshkinniń mýzei úiiniń meńgerýshisi Asyljan Myrzabolatova, Qazaqstan Respýblikasy Ulttyq Banki Qolma-qol aqsha ainalysy departamentiniń banknottar men monetalar dizainy basqarmasynyń bas mamany-dizaineri Janna Núgerbek, sondai-aq «Habar» telearnasynyń «7 kún» baǵdarlamasy orys redaktsiiasynyń redaktor-taldaýshysy Alma Orazbaeva marapattaldy.
