Qazaqstanda ótken táýlikte 757 adamnyń analizinen koronavirýs anyqtaldy. 181-i – Nur-Sultan turǵyny. Qaraǵandy oblysynda da naýqastar azaimai tur. Munda 14 maýsymda 161 naýqas tirkelgen.
Nur-Sultan qalasy koronavirýs boiynsha "qyzyl aimaqta" qalyp otyr. Densaýlyq saqtaý ministri Aleksei Tsoi seisenbi kúni ótken aptamen salystyrǵanda astanada naýqastar 7 paiyzǵa kóbeidi dep málimdedi. Qalǵan qalalar men oblystar "sary" jáne "jasyl aimaqta".
2020 jyldyń naýryz aiynan beri elde 402 996 adamnyń koronavirýs testi oń shyqqan.
13 maýsymda taǵy úsh adam pnevmoniianyń koronavirýsqa uqsas túrine shaldyqqan. Elde koronavirýs pen koronavirýs pnevmoniiasyna shaldyqqandar bólek esepteledi. Biraq halyqaralyq uiymdardyń saitynda eki kórsetkish biriktirilgen. 2020 jyldyń 1 tamyzynan beri elde 56 216 adam "pnevmoniiamen" aýyrǵan.
Indet bastalǵaly beri 4180 adam (13 maýsymda 9 adam qaitys bolǵan) koronavirýstan qaitys bolǵan. Taǵy 3416 adamnyń ólimine koronavirýs pnevmoniiasy sebep boldy dep aitylady. Odan bólek, indet bastalǵaly beri shamamen 2 myń adam koronavirýstyń "janama áserinen" qaitys bolǵan. Qazaqstanda mundai adam ólimi kórsetkishi Covid statistikasyna engizilmeidi.
15 maýsym tańerteńgi málimet boiynsha, elde 21 204 adam (95 paiyzyna virýs juqqany testpen dáleldengen) koronavirýstan emdelip jatyr. Statsionarda 6 655 adam jatyr. 458 adamnyń jaǵdaiy – aýyr, 110 naýqastyń jaǵdaiy óte aýyr, 69 adam jasandy tynys apparatyna qosylǵan.
Sońǵy málimet boiynsha, elde 2 mln 547 myń adam koronavirýsqa qarsy vaktsinanyń keminde bir dozasyn alǵan. 1 mln 435 myńy eki dozasyn alǵan. Azamattarǵa reseilik "Spýtnik V", qazaqstandyq QazVac jáne qytailyq Sinopharm jáne "Sinovac Biotech Ltd" kompaniiasynyń CoronaVac (Sinovac) vaktsinasy egilip jatyr.
Amerikalyq Djons Hopkins ýniversitetiniń dereginshe, indet bastalǵaly beri álemde 176,2 mln 206 myń adamnan koronavirýs anyqtalǵan. 3,8 mln adam qaitys bolǵan.
