Foto: gov.kz
Semei qalasynyń turǵyny eki balasyna uzaq ýaqyt aliment tólemegeni úshin jaýapqa tartylyp, aqyry bas bostandyǵynan aiyryldy, dep habarlaidy Ult.kz.
38 jastaǵy er adam jeti jylǵa jýyq ýaqyt boiy eki kámeletke tolmaǵan balasyna aliment tóleýden jaltaryp kelgen. Sonyń saldarynan onyń qaryzy bes million teńgeden asyp ketken.
Sot sheshimimen ol kináli dep tanylyp, bir jyl merzimge bas bostandyǵyn shekteý jazasyna kesilgen. Sonymen qatar oǵan alkogolge táýeldilikten májbúrli túrde ambýlatorlyq em qabyldaý mindettelgen.
Sottalǵan azamat Semei qalasynyń Ortalyq aýdanynyń probatsiia qyzmetine esepke alynǵan. Alaida profilaktikalyq jumystar júrgizilgenine qaramastan, ol belgilengen talaptardy birneshe ret buzǵan. Atap aitqanda, probatsiia qyzmetine tirkelýge kelmei, túngi ýaqytta ruqsatsyz turǵylyqty jerinen ketken.
Osyǵan bailanysty sot bas bostandyǵyn shekteý jazasyn 11 ai merzimge bas bostandyǵynan aiyrý jazasyna aýystyrdy.
Sottalǵan er adam óz sózinde ótken ómirine ókinish bildirip, otbasy men balalarynyń seniminen aiyrylǵanyn moiyndady.
Probatsiia qyzmetiniń málimetinshe, mundai esepte turǵan azamattarǵa qoǵamnan oqshaýlaýsyz túzelýge múmkindik beriledi. Alaida jazany óteý talaptary júieli túrde buzylǵan jaǵdaida, sot jazany qatańdatý týraly sheshim qabyldaidy.
Semei qalasy Ortalyq aýdanynyń probatsiia qyzmetiniń bastyǵy Erjan Espolatovtyń aitýynsha, bas bostandyǵyn shekteý — adamnyń ómirin túzep, otbasy aldyndaǵy mindetterin oryndaýyna beriletin múmkindik. Biraq bul talaptar saqtalmaǵan jaǵdaida jaza bas bostandyǵynan aiyrýmen almastyrylady.
