Elimizdiń 7 kompaniiasy IT-ónimi senimdi baǵdarlamalyq qamtylymnyń tizilimine engizildi.
Bul týraly QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev Facebook paraqshasynda jazdy, dep habarlaidy "Ult aqparat".
«Túrli kompaniialardyń taǵy 7 IT-ónimi senimdi baǵdarlamalyq qamtylymnyń tizilimine engizildi. Bul, shyn máninde, jaǵymdy jańalyq. «Memleket jeke kompaniialardyń derbes derekterdi qorǵaýyn, aqparattyq qaýipsizdik normalaryn saqtaýyn qalai qadaǵalaýda?» dep menen únemi suraisyzdar. bul suraqty osy jerde, iaǵni Facebook áleýmettik jelisinde de qoidyńyzdar. Joǵaryda atalǵan tizilim qaýipsizdik mehanizmderiniń biri»,- dedi ministr.
Onyń atap ótýinshe, tizilimge ený úshin kompaniialar, ózge de talaptarmen qatar, óz óniminiń aqparattyq qaýipsizdiktiń bekitilgen memlekettik talaptaryna sáikes keletinin dáleldeýi jáne rastaýy tiis. Óitkeni, osy softty satyp alatyn memlekettik organ nemese jeke kompaniia bolsyn, kez kelgen paidalanýshy bul baǵdarlamalardyń sapasy men qaýipsizdigine senimdi bola alady.
«Osy joly «T&T Security» kompaniiasynyń – «tLab» júiesi, «ArtaSoftware» JShS-niń Arta Synergy platformasy, «Kazdream Technologies» JShS-niń KiberStraj ónimi, «Platonus» kompaniiasynyń «ESÝVO» jáne «Platonus College» ónimderi, «GeoKom Astana» JShS-niń GeoPortaly jáne «Documentolog» kompaniiasynyń attas júiesi joǵary sapa standarttaryna sáikestigin rastady.
Osylaisha, atalǵan tizilimge engen kompaniialardyń sany 16-ǵa jetti. IT-qoǵamdastyqty óz ónimderin osy Tizilimge engizýde belsendilik tanytyp, memleketten «senimdi» degen mártebege ie bolýǵa shaqyramyn. Memleket tarapynan berilgen mundai kepildik kompaniianyń jáne onyń ónimderiniń naryqtaǵy qunyna oń áser etetini sózsiz», - dedi Asqar Jumaǵaliev.
