Kollaj: aikyn.kz
Shymkenttegi kámeletke tolmaǵandardyń isteri jónindegi mamandandyrylǵan aýdanaralyq sotta qarjy piramidasyn qurý jáne júrgizý is boiynsha úkim shyqty, - dep habarlaidy Ult.kz OTYRAR-ǵa silteme jasap.
Is boiynsha 10 adam sot aldynda jaýap berdi. Olardyń biri qylmysty kámeletke tolmaǵan kezinde jasaǵan.
Sot dereginshe, piramidany uiymdastyrǵan K. esimdi áiel 2024–2025 jyldary áleýmettik jeliler arqyly ózin "investitsiialyq joba" retinde jarnamalap, adamdarǵa tez ári joǵary tabys ýáde etken. Qarajatty aýdarymmen de, qolma-qol da qabyldaǵan. Nátijesinde piramidanyń ainalymyna 600 million teńgeden asa aqsha tartylǵan.
Iz jasyrý jáne jaýapkershilikten qutylý úshin ol qarjyny kýágerdiń shotyna aýdaryp, odan jalǵan túbirtek berýdi talap etken.
Al qalǵan qatysýshylar piramidanyń jumysyn júrgizýge kómektesken: salymshylarǵa bank rekvizitterin bergen, túbirtekterdi qabyldaǵan jáne uiymdastyrýshy men jábirlenýshiler arasynda deldal bolǵan.
Prokýror sottan bas bostandyǵynan aiyrý jazasyn surap, kei aiyptalýshylarǵa jaza oryndaýyn keiinge shegerýdi usynǵan. Jábirlenýshiler ádil ári zańdy sheshim shyǵarýdy ótingen. Aiyptalýshylar kináni ishinara moiyndap, temir torǵa qamamaýdy suraǵan.
Sot piramidany uiymdastyrǵan áieldi birneshe bap boiynsha kináli dep tanydy: qarjy piramidasyn qurý, aqsha jylystatý jáne kýágerdi satyp alý. Oǵan múlkin tárkilei otyryp, 10 jylǵa bas bostandyǵynan aiyrý jazasy taǵaiyndaldy. Alaida jazany óteý 1 jylǵa keiinge shegerildi.
Qalǵan 9 adam 2 jyldan 7 jylǵa deiingi merzimge sottaldy. Olardyń altaýyna jaza oryndaý 3 jylǵa shegerildi. Al qylmysty kámeletke tolmaǵan kezde jasaǵan sottalýshyǵa 1 jyl merzimge probatsiialyq baqylaýmen shartty jaza berildi.
Sonymen qatar, sottalǵandarǵa aqsha jinaý, investitsiia tartý siiaqty qyzmet túrlerimen ainalysýǵa tyiym salyndy.
