Taraz qalasynda Qordai aýdanynda bolǵan jappai tártipsizdikterge qatysty qylmystyq is boiynsha sot protsesi ótip jatyr, dep habarlaidy "Ult aqparat".
Tarazdaǵy ÝJD 158/1 TI-13 tergeý izoliatorynyń ǵimaratynda Qordai aýdanynda osy jyldyń aqpan aiynda bolǵan jappai tártipsizdik faktileri boiynsha aldyn ala tyńdaý ótti.
Protsess ashyq rejimde jáne sot protsesine qatysýshylardyń densaýlyǵyna qaýip tóndirmeý jáne koronavirýs infektsiiasynyń taralýyna jol bermeý maqsatynda barlyq sanitarlyq talaptar saqtala otyryp ótkizilýde.
Qatysýshylardyń zaldaǵy oryndary áleýmettik qashyqtyqtyń saqtalýymen ornalastyrylǵan. Dezinfektsiialyq, sanitarlyq jáne antiseptikalyq tazartqyshtar, elektrondy termometrler ornatylǵan. Protsestiń barlyq qatysýshylary PTR-testiden ótedi. Sottalýshylardyń týystaryna yńǵaily bolý úshin bólmeler jabdyqtalǵan.
BAQ ókilderine Taraz qalasynyń №2 soty ǵimaratynda tergeý izoliatorynan sot protsesin tikelei efirde kórsetetin arnaiy zal berildi. Qordai aýdanynyń sotynda jábirlenýshilerge arnalǵan zal jabdyqtalǵan, onda da protsess onlain-rejimde ótedi.
Isti Jambyl oblysynyń Qylmystyq ister jónindegi mamandandyrylǵan aýdanaralyq soty qaraidy. Protseske birneshe ondaǵan advokat qatysýda.
Tártipsizdikter men basqa da qylmystarǵa qatysqany úshin sot aldynda 51 adam jaýap berýde. Olardyń 33-i qamaýda, 16-sy úshin kepilgerlik túrindegi bultartpaý sharasy tańdaldy. Ekeýinen eshqaida ketpeý jáne tiisti minez-qulyqty saqtaý týraly qolhat alynǵan.
Qordai aýdanyndaǵy jappai tártipsizdik isi boiynsha 366 adam jábirlenýshi bolyp tanyldy.
3 jeltoqsan kúni keshke aiaqtalǵan aldyn ala tyńdaý barysynda osy jyldyń 7-8 aqpanynda Qordai aýdanynyń Masanshy, Sortóbe jáne Bular batyr aýyldarynda kóptegen adamnyń qatysýymen jappai tártipsizdik bolǵany aityldy. Tártipsizdik kezinde 10 aýyldyq turǵyn qaza tapty, bireýi saýda ortalyǵynyń qiraýynan mert boldy. 158 azamat pen quqyq qorǵaý organdarynyń 20 qyzmetkeri dene jaraqatyn alǵan. 156 turǵyn úige jáne saýda obektilerine, 102 avtokólikke zaqym keldi.
Tergeý barysynda Qordai oqiǵalary týraly is boiynsha barlyq qajetti dálelder jinaldy. Jappai tártipsizdikterge qatysy bar barlyq adam anyqtalyp, Qazaqstan zańnamasyna sáikes jazalanady.
Eske salaiyq, biylǵy jyldyń aqpan aiynda Jambyl oblysy Politsiia departamentiniń tergeý basqarmasy QR QK 293-baby (Buzaqylyq) boiynsha sotqa deiingi tergeýdi bastaǵan bolatyn. Qordai aýdanynyń Masanshy aýylynda turǵyndar arasynda jappai tóbeles boldy. Keiin Masanshy, Sortóbe aýyldarynda 47 adam ustalyp, sotqa deiingi tergeý QR QK 272-baby (Jappai tártipsizdikterdi uiymdastyrý jáne oǵan qatysý), sondai-aq QR QK 99-baby (Adam óltirý) boiynsha bastaldy.
IIM basshysy Erlan Turǵymbaev qoǵamdyq tártipti buzǵany úshin barlyq kináliler QR zańnamasyna sáikes jaýapkershilikke tartylatynyn atap ótti.
Protseske Jambyl oblysynyń qylmystyq ister jónindegi mamandandyrylǵan aýdanaralyq sotynyń sýdiasy Aidarbek Zambaev tóraǵalyq etýde.
