2021 jyldyń 6 aiynda 458 878 otbasyǵa tabysyna qaramastan 141 mlrd teńge járdemaqy aýdaryldy. Bul týraly QR Eńbek jáne halyqty áleýmettik qorǵaý ministrligi Áleýmettik kómek saiasatyn damytý departamentiniń direktory Asqar Niiazov aitty, dep habarlaidy QazAqparat.
«2020 jyly bala kútimine bailanysty járdemaqy jalpy somasy 31,7 mlrd teńge kóleminde 120,9 myń adamǵa tólendi. Al 2021 jylǵa bul maqsatqa 26 mlrd teńge qarastyrylyp otyr. Onyń ishinde árbir balaly otbasyǵa bala týýyna bailanysty 6,8 mlrd teńge járdemaqy tólendi. Qazirgi ýaqytta elimizde 458 myńnan astam kópbalaly otbasy bar. Bul sanatqa kámeletke tolmaǵan 4 jáne odan da kóp balasy, onyń ishine 23 jasqa tolmaǵan, kúndizgi oqý bóliminde oqityn stýdentteri bar otbasylar qosylyp otyr», - dedi ol Ortalyq kommýnikatsiialar qyzmetindegi brifing barysynda.
Onyń dereginshe, mundai otbasylarǵa 2021 jyldyń 1 qańtarynan bastap tabysyna qaramastan tólenetin járdemaqy engizilgen. Tólemderdiń mólsheri bala sanyna bailnysty saralanǵan túrde tólenedi. 4 balaǵa 46 760 teńge, 5 balaǵa 58 457 teńge, 6 balaǵa 70 154 teńge, al odan keiingi balalardyń árqaisysyna 11 668 teńgeden beriledi. Bul tólem ai saiyn otbasynyń tabysyna qaramastan júrgiziledi.
«Osy jyldyń 6 aiynda atalǵan járdemaqy 458 878 otbasyǵa jalpy somasy 141 mlrd teńge kóleminde aýdaryldy. Munan basqa elimizde kópbalaly ardaqty analarymyz bar. Ardaqty analarymyzdy da áleýmettik qoldaý sharalary qarastyrylǵan. Analardyń abyroiy men bedelin arttyrý úshin tabysyna qaramastan Altyn alqa, Kúmis alqa iegerlerine memlekettik járdemaqy taǵaiyndalady. Qazirgi ýaqytta járdemaq mólsheri 18 669 teńgeni qurap otyr. Atalǵan járdemaqy 231,3 myń batyr analarymyz alady. Jyl basynan olarǵa 25,8 mlrd teńge kóleminde qarajat tólendi», - dedi Asqar Niiazov.
