Tabysynan ýaqytsha aiyrylǵan azamattarǵa beriletin 42500 teńge járdemaqy kei turǵyndarǵa proaktivti túrde taǵaiyndalady. Bul týraly QR Eńbek jáne halyqty áleýmettik qorǵaý ministri Birjan Nurymbetov málimdedi, dep habarlaidy QazAqparat.
«Ótken jolǵy málimetterge súienip, 42500 teńgeni nege tólei salmaisyzdar?» degen suraq qoiylyp jatyr. Iá, bizde búkil málimet bar. Biraq, búgingi shekteýler TJ qaraǵanda jeńildeý jáne ár óńirde ár sanitarlyq dárigerdiń shekteýleri ózgeshe. Kóp qurylys nysandary, qyzmet kórsetý salalary jumys istep jatyr. Onyń ústine ótken joly ótinim bermegen kisiler bul joly aqysyz demalysqa ketýi múmkin. Sondyqtan, qaitadan ótinish berilýi tiis», - dep atap ótti ministr Ortalyq kommýnikatsiialar qyzmetinde ótken brifingte.
Degenmen, ministrlik járdemaqyny proaktivti formatta taǵaiyndaýdy qarastyryp jatyr.
«Ótkende 42500 teńgeni sátti alǵan turǵyndardy saraptai kelip, jaǵdaiy ózgermedi-aý dep boljaǵan kisilerge suraý jiberip jatyrmyz. Siz ótkende 42500 teńge aldyńyz, bul joly da tabysyńyzdan aiyryldyńyz ba degen SMS jiberdik. Iá degen jaýap kelse, sol turǵynǵa esh ótinishsiz tólem taǵaiyndaý sharasyn jasaimyz. Sondyqtan, búgin SMS alǵan kisiler tabystan aiyrylǵanyńyzdy rastaǵan bolsańyz, erteń juma kúni portaldarǵa ótinish berýdiń qajeti joq. Jai ǵana óz mártebeńizdi tekserseńiz, «Siz úshin ótinish qabyldandy» dep jazylyp turady», - dedi B. Nurymbetov.
Sonymen birge ministr járdemaqy alýǵa ótinishterdiń 1 qyrkúiekke deiin qabyldanatynyn jetkizdi.
«Bul joly osy kúnge deiin úlgerý kerek degen esh shekteý qoimaimyz. Bul tólem shilde aiyna arnalady. Biraq portaldar 1 qyrkúiekke deiin ótinish qabyldai beredi», - dedi B. Nurymbetov.
