Foto: videodan alynǵan skrin
Asa iri kólemdegi urlyqqa kúdikti Qazaqstan azamaty Grýziiadan ekstraditsiialandy. Operatsiia Bas prokýratýra men Qarjy monitoringi agenttiginiń úilestirýimen, Qazaqstannyń Grýziiadaǵy elshiliginiń qoldaýymen júzege asty, dep habarlaidy Ult.kz.
Tergeý derekterine sáikes, kúdikti kompaniia basshysy bola otyryp, aldyn ala sóz bailasqan adamdar tobymen birge memlekettik satyp alý talaptaryn ainalyp ótken. Ol spýtniktik jáne telekommýnikatsiialyq jabdyqtardy jalǵa alý boiynsha zańsyz kelisimshart jasasyp, senip tapsyrylǵan qarajatty jymqyrǵan.
Atalǵan shema arqyly «Transtelekom» AQ-ǵa keltirilgen shyǵyn kólemi 4 milliard teńgeden asqan.
Qylmys jasalǵannan keiin kúdikti elden qashyp, halyqaralyq izdeýge jariialanǵan. Biyl naýryz aiynda ol Grýziia aýmaǵynda ustalyp, Qazaqstannyń suraýy boiynsha elge qaitaryldy.
Qazirgi ýaqytta kúdikti tergeý izoliatoryna qamaldy. Oǵan taǵylǵan aiyptar dáleldengen jaǵdaida, múlki tárkilenip, 12 jylǵa deiin bas bostandyǵynan aiyrylýy múmkin.
