Foto: ashyq derekkózden
Áleýmettik jelide qazaqstandyq áiel kishkentai qyzyna ákesi tarapynan jynystyq sipattaǵy áreket jasalǵany týraly málimdep, zańgerden kómek suraǵany jóninde jazba tarady, dep habarlaidy Ult.kz.
Jazbada anasy 2,5 jastaǵy qyzynyń mazasyzdanyp, densaýlyǵyna shaǵym aita bastaǵannan keiin kúdiktene bastaǵanyn jetkizedi. Onyń aitýynsha, bala jynys múshesiniń aýyratynyn aityp, ákesi týraly túsiniksiz jaittardy sóz etken.
Anasy bastapqyda qyzynyń sózin naqty túsinbei, mán bermegenin jazady. Alaida keiin bala ákesiniń ózine orynsyz áreket jasaǵanyn isharamen jetkizgen. Osydan soń áiel quqyq qorǵaý organdaryna júgingen.
Onyń aitýynsha, aryz birden qabyldanbaǵan. Keiin is tirkelip, anasy men bala daǵdarys ortalyǵynda psihologtyń qatysýymen suralǵan. Jelide jariialanǵan málimetke sáikes, tergeý barysynda kishkentai qyz ákesiniń ózine qatysty ádepsiz áreketter jasaǵanyn aitqan.
Oqiǵaǵa bailanysty Shyǵys Qazaqstan oblysynyń politsiia departamenti resmi pikir bildirdi. Vedomstvo Óskemen qalasynyń turǵynynyń aryzy negizinde aldyn ala tergeý bastalǵanyn habarlady.
«Qazirgi ýaqytta istiń barlyq mán-jaiyn tolyq ári jan-jaqty anyqtaýǵa baǵyttalǵan qajetti tergeý áreketteri júrgizilýde. QR Qylmystyq-protsestik kodeksiniń 201-babyna sáikes ózge aqparat jariialanbaidy», – delingen resmi habarlamada.
Qazir is quqyq qorǵaý organdarynyń baqylaýynda. Tergeý nátijesi boiynsha protsessýaldyq sheshim qabyldanady.
