Foto: Liter.kz
2050 jyldarǵa qarai elimizdiń soltústik óńiri halqynyń sany 30 paiyzǵa deiin azaiýy múmkin, dep habarlaidy Kazinform HAA.
Mundai pikirdi atalǵan óńirdiń demografiialyq ahýalyna 3 jyl boiy zertteý júrgizgen S.Seifýllin atyndaǵy Qazaq agrotehnikalyq ýniversitetiniń qaýymdastyrylǵan professory Qairat Bodaýhan aitty.
«Elimizde qalyptasqan demografiialyq ahýal, onyń ishinde soltústik óńirlerdegi halyqtyń depopýliatsiiasy, ýrbanizatsiiasy, týýdyń tómendeýi máselesi qanshama jyldan beri kóterilip keledi. Soǵan bailanysty ońtústikten soltústikke qonys aýdarý memleket baǵdarlamasy qabyldandy. Alaida, bul baǵdarlama tiisti nátije bermei otyr. Óitkeni, osy salada ǵylymi tujyrymdalǵan zertteýler joq desek te bolady. Biz kóbine sandyq málimettermen, «osynsha adamdy kóshirdik», «osynshama qarjy bóldik», «osynshama adam keldi» degen siiaqty derektermen shektelemiz. Biraq, nátijesi belgisiz. Iaǵni, kóp jaǵdaida tipti «kóship kelgen adamdar qalai ornalasty», «qanshasy keri kóship ketti», «olardyń jaǵdaiy qandai», «olar belgili bir dárejede kelesi kóshi-qon aǵynyna oń áser bere aldy ma», «oblystyń eńbek tapshylyǵy máselesin sheshýge úlesin qosa aldy ma» degen siiaqty kóptegen másele qarastyrylmaidy», - dedi ǵalym.
Onyń atap ótýinshe, osyǵan orai «Qazaqstan Respýbilkasynyń soltústik óńirlerindegi demografiialyq ahýal: demografiialyq taldaýdyń modelderi men ádisteri» taqyrybynda úsh jyldyq zertteý júrgizilgen.
«Nátijesinde beligili bir tujyrymdar jasadyq. Árine, bul barlyq máseleni sheship tastaidy dep aita almaimyz. Degenmen, ǵylymi-zertteý júrgizý, arnaiy sol óńirlerdi aralaý, kóship kelgen aǵaiyndarmen sóilesý jáne oblysta qalyptasyp otyrǵan demografiialyq ahýalǵa zertteý júrgizý, sarapshylardy tartý arqyly belgili bir dárejede tujyrymǵa keldik. Soltústik óńirlerdegi halyq sanynyń jyl saiyn tómendeýi baiqalady. Máselen, 10 myń adam kóship kelse, 18 myń adam kóship ketedi. Demografiialyq boljamdarǵa qaraǵanda, 2050 jyldarǵa qarai bul óńirdiń halyq sany 30 paiyzǵa deiin kemýi múmkin», - dedi Qairat Bodaýhan.
