Foto: Ida.kz
Kólik vitse-ministri Maqsat Qaliaqparov tóraǵalyǵymen avtojol salasyn damytýdyń 2026 jylǵa arnalǵan josparlary talqylanǵan keńeitilgen keńes ótti, dep habarlaidy Ult.kz.
Jiynǵa Avtomobil joldary komitetiniń, vedomstvolyq uiymdardyń, óńirlik basqarmalardyń basshylary qatysty. Kezdesýde ótken jol-qurylys maýsymynyń qorytyndylary shyǵarylyp, aldaǵy kezeńniń basym baǵyttary aiqyndaldy.
2025 jylǵy nátije: 13 myń shaqyrym jol qamtyldy
Ótken jyly barlyq jumys túrlerimen shamamen 13 myń shaqyrym jol qamtylǵan. Onyń ishinde 6 myń shaqyrym jolda jumystar tolyq aiaqtalǵan:
3 myń shaqyrym – respýblikalyq mańyzy bar joldar;
3 myń shaqyrym – jergilikti joldar.
Jyl qorytyndysy boiynsha normativtik jaǵdaidaǵy joldardyń úlesi respýblikalyq jelide 94%-ǵa, jergilikti jelide 91%-ǵa deiin jetken.
Avtojoldarda 10 myńnan astam tehnika men 25 myńǵa jýyq jumysshy jumyldyrylyp, 10 mln tonnadan astam asfaltbeton tóselgen. Sondai-aq 1,2 mln tonnaǵa jýyq jol bitýmy paidalanylǵan.
2026 jylǵy jospar: 11 myń shaqyrym joba
Biyl respýblikalyq jáne jergilikti mańyzy bar 11 myń shaqyrymnan astam jol túrli jobalarmen qamtylady. Bul – jańa qurylys, rekonstrýktsiia, kúrdeli jáne ortasha jóndeý jumystaryn qamtidy.
Memleket basshysynyń bastamasymen birqatar strategiialyq baǵyttardy iske asyrý bastalady. Atap aitqanda:
«Ortalyq – Batys»;
«Qaraǵandy – Jezqazǵan»;
«Saryaǵash qalasyn ainalyp ótý joly».
Bul jobalar óńirler arasyndaǵy kólik bailanysyn nyǵaityp, eldiń tranzittik áleýetin arttyrýǵa baǵyttalǵan.
«E-Joldar» júiesi engiziledi
Keńeste salany tsifrlandyrý máselesi de qozǵaldy. Qazirgi ýaqytta respýblikalyq jáne jergilikti joldar týraly derekterdi biriktiretin «E-Joldar» biryńǵai aqparattyq júiesi ázirlenip jatyr.
Júiede «Jol pasporty», «Jol jóndeý» jáne «Qoǵamdyq baqylaý» modýlderi daiyndalǵan. 2026 jyldyń ekinshi jartysynda «Taldaý», «Júrgizýshilerge arnalǵan infroortalyq» jáne «Jaǵdailyq ortalyq» modýlderin iske qosyp, júieni pilottyq rejimde engizý josparlanǵan.
Tsifrlandyrý joldardyń jai-kúiin jedel baqylaýǵa, atqarylǵan jumystardyń sapasyn qadaǵalaýǵa jáne infraqurylymdy tiimdi basqarýǵa múmkindik beredi.
Basymdyqtar qandai?
Keńes barysynda Astana aglomeratsiiasyn damytý, jergilikti jol jelisin jańǵyrtý, salalyq ǵylymdy ilgeriletý jáne kadr daiarlaý máseleleri de qaraldy.
Jiyn qorytyndysynda Maqsat Qaliaqparov sapany qamtamasyz etý, belgilengen merzimderdi saqtaý, zamanaýi tehnologiialardy engizý jáne barlyq jobalardy tolyq iske asyrý negizgi basymdyq bolatynyn atap ótti.
