Foto: Aqorda
Memleket basshysy Qasym-Jomart Toqaev Túrkistan oblysynyń ákimi Nuralhan Kósherovti qabyldady, dep habarlaidy Ult.kz.
Kezdesý barysynda Prezidentke Túrkistan oblysynyń áleýmettik-ekonomikalyq damýy jáne aldaǵy kezeńge arnalǵan josparlar týraly baiandaldy. Ákimniń aitýynsha, óńirdiń ekonomikalyq ósimi 113,9 paiyzdy quraǵan. Sondai-aq memlekettik biýdjetke túsetin salyq túsimderi 1 trillion teńgege artqan.
Nuralhan Kósherovtiń málimetinshe, 2025 jyly aimaqqa 1,7 trillion teńge investitsiia tartylǵan. Onyń ishinde 1,4 trillion teńgesi – jeke investitsiialar. Al tikelei sheteldik investitsiia kólemi 1,4 milliard dollarǵa jetken.
Byltyr jalpy quny 340 milliard teńge bolatyn 58 investitsiialyq joba iske qosylyp, 8 myńnan astam jańa jumys orny ashylǵan. Qazirgi ýaqytta oblysta 21 indýstrialdyq aimaq jumys isteidi. Sonymen qatar Turan arnaiy ekonomikalyq aimaǵynda jalpy quny 315 milliard teńge bolatyn 26 joba júzege asyrylyp jatyr.
Aýyl sharýashylyǵy salasynda maqta-toqyma, júgeri jáne et óndirisi klasterleri damyp keledi. Bul jobalar tolyq iske asqanda 2027 jylǵa qarai aýyl sharýashylyǵy ónimderiniń kólemi qosymsha 479,5 milliard teńgege artady dep josparlanyp otyr.
Ákimniń aitýynsha, sońǵy úsh jylda ataýly áleýmettik kómek alýshylar sany eki esege qysqarǵan. Sonymen qatar 148 myń adam jumyspen qamtylyp, óńirdegi jumyssyzdyq deńgeii 4,6 paiyzdy quraǵan.
Kezdesý barysynda bilim berý, densaýlyq saqtaý, mádeniet nysandaryn salý, jol infraqurylymyn damytý, gazdandyrý jáne eldi mekenderdi aýyz sýmen qamtamasyz etý baǵytyndaǵy jumystar da talqylandy.
Prezident investitsiia tartý, aýyl sharýashylyǵy men óndiristi damytý jumystaryn jalǵastyrýdy tapsyrdy. Sondai-aq halyqtyń turmys sapasyn arttyrý, jańa jumys oryndaryn ashý jáne infraqurylymdy damytý máselelerine erekshe nazar aýdarý qajet ekenin atap ótti.
