Foto: shutterstock.com
2025 jyldyń basynan bastap 1 070 etnikalyq qazaq tarihi Otanymen qaýyshyp, qandas mártebesin ielendi. Jalpy, 1991 jyldan beri Qazaqstanǵa 1 million 149 myńnan astam etnikalyq qazaq oralǵan. Bul týraly Eńbek jáne halyqty áleýmettik qorǵaý ministrligi málimdedi, dep habarlaidy Ult.kz.
Jyl basynan beri Qazaqstanǵa kelgen qandastardyń basym bóligi Qytaidan (51,9%), Ózbekstannan (37,5%), Túrikmenstannan (7,1%), Reseiden (1,8%) jáne ózge elderden (1,7%) qonys aýdardy.
2025 jylǵy 1 aqpandaǵy derekke sáikes, etnikalyq kóship kelgenderdiń 60,2%-y eńbekke jaramdy jasta, 32,9%-y – kámeletke tolmaǵandar, al 6,8%-y – zeinetkerler. Eńbekke jaramdy qandastardyń ishinde 16,7%-y joǵary bilimdi, 32,9%-y orta kásibi bilimdi, 48,4%-y jalpy orta bilimdi, al 1,9%-ynyń bilimi joq.
Etnikalyq qazaqtar Qazaqstannyń túrli aimaqtaryna qonystanǵanymen, Aqmola, Abai, Atyraý, Qostanai, Pavlodar, Shyǵys Qazaqstan, Batys Qazaqstan jáne Soltústik Qazaqstan oblystary eńbek kúshi tapshy óńirler retinde belgilendi.
2025 jylǵa atalǵan óńirler úshin qandastardy qabyldaý kvotasy 2 309 adamdy quraidy. Biylǵy 1 aqpanǵa deiin osy óńirlerge 171 qandas kóship bardy.
Qonys aýdarǵan qandastarǵa memleketten qoldaý kórsetiledi. Atap aitqanda, kóshýge arnalǵan sýbsidiia retinde otbasynyń árbir múshesine 70 AEK (275,2 myń teńge) mólsherinde bir rettik tólem beriledi. Sonymen qatar, bir jyl boiy turǵyn úi jaldaýǵa jáne kommýnaldyq qyzmetterdi tóleýge 15-ten 30 AEK (59-dan 118 myń teńgege deiin) qarjy bólinedi.
Erikti qonys aýdarýdy yntalandyrý maqsatynda jumys berýshiler men qandastarǵa qosymsha qoldaý sharalary qarastyrylǵan. Onyń ishinde turǵyn úi satyp alý nemese salý, sondai-aq ipotekalyq qaryzdyń bastapqy jarnasyn tóleý úshin ekonomikalyq utqyrlyq sertifikaty usynylady. Bul sertifikat turǵyn úi qunynyń 50%-yn nemese bir otbasyna 4,56 mln teńgege deiin óteýsiz negizde jabýǵa múmkindik beredi.
