Foto: áleýmettik jeli
Ulytaý oblysynda tórt balanyń anasyn pyshaqtap óltirdi. Kúdikti retinde marqumnyń 33 jastaǵy birge turǵan azamaty tanyldy, dep habarlaidy Ult.kz Qaz365.kz saityna silteme jasap.
Jaqyndarynyń aitýynsha, er adam jumys istemegen, ishimdikke salynyp, áielge jii turmystyq zorlyq-zombylyq kórsetken. Qaiǵyly oqiǵaǵa az ýaqyt qalǵanda áiel onymen aiyrylysamyn dep sheshim qabyldaǵan, biraq oǵan óz páterinde ýaqytsha turýǵa ruqsat bergen.
Oqiǵa bolǵan kúni áiel óz dúkeninde bolǵan. Saǵat 13:55 shamasynda birge turǵan adamy sol jerge kelip, oǵan pyshaqpen shabýyl jasaǵan. Týystarynyń sózinshe, er adam áielge shamamen 20 ret pyshaq suǵyp, mańyzdy aǵzalaryn zaqymdaǵan. Shabýyldan keiin er adam ózine qol jumsamaq bolypty. Qazir ol Jezqazǵan qalasyndaǵy aýrýhanada jatyr.
Vedomstvo ókilderi kúdikti emdelip shyqqan boida birden tergeý izoliatoryna qamalatynyn atap ótti.
Tergeý barysy politsiia departamenti basshylyǵynyń erekshe baqylaýyna alynǵan. Al marqumnyń týystary istiń ádil tergelýin talap etip, balalarǵa qamqorshylyq rásimdeýge nietti.
