156 maining qurylǵysymen kripto óndirgen: Temirtaýda 185 mln teńge tapqan azamat sottaldy

Foto: aikyn.kz

Qaraǵandy oblysynyń Temirtaý qalasynda tsifrlyq aktivterdi zańsyz óndirý faktisi boiynsha sot úkimi shyqty. Bul týraly Qarjylyq monitoring agenttiginiń baspasóz qyzmeti habarlady.

Tergeýdi Qarjylyq monitoring agenttiginiń Qaraǵandy oblysy boiynsha departamenti júrgizgen.

Is materialdaryna sáikes, E.G. Tolovov 2021 jyldyń tamyz aiynan bastap litsenziiasyz kriptoferma uiymdastyrǵan. Ol Reseiden 156 dana maining jabdyǵyn satyp alyp, olardy ózine tiesili óndiristik bazaǵa ornatqan.

Tergeý málimetinshe, kúdikti óndirilgen tsifrlyq aktivterdi kriptobirjadaǵy jeke akkaýntynda jinap, keiin BinancePool jáne Litecoinpool.org maining pýldary arqyly satqan. Saýda operatsiialary P2P-aýdarymdar arqyly jáne USDT-ny teńgege aiyrbastaý jolymen júzege asqan.

Nátijesinde zańsyz óndirilgen aktivterdiń jalpy kólemi 11,2 BTC jáne 90,2 LTC bolǵan. Onyń naryqtyq quny shamamen 185 million teńgeni quraidy.

Sot úkimimen aiyptalýshy 1 jylǵa bas bostandyǵynan aiyrylyp, barlyq maining jabdyǵy tárkilendi. Sonymen qatar memleket kirisine qylmystyq jolmen alynǵan 185 million teńge óndirildi.

Sot sheshimi zańdy kúshine endi.

Aita keteiik, buǵan deiin Aqtóbede 3,5 mlrd teńgege zańsyz kriptoainalym jasaǵan toptyń áshkerelengeni habarlanǵan bolatyn.